सर्बस्व गुमाएकी बुटीले बास मागिन्, सचीले सिंगो गाउँलाई नै आश्रय दिइन्

भोटेकोशीमा बाढी आएको केही दिनपछि बाढीबाट ज्यान जोगाएका रसुवाका बासिन्दा सुरक्षित ठाउँ खोज्दै नुवाकोट सदरमुकाम बिदुरतिर आइरहेका थिए । धेरैले त्यहीँका विद्यालय र सार्वजनिक भवनहरुमा आश्रय लिइरहेका थिए । 

नुवाकोटको बट्टारमा हिमालयन एकेडेमी नामको निजी स्कुल चलाइरहेकी सचि चित्रकार आफ्नै स्कुलमा थिइन् । एक महिला आएर उनीसँग आश्रय मागिन् ।

बाढीमा श्रीमान, घर र माइतीपट्टि गरी १२ जना आफन्त गुमाएको र उनीहरुको अन्तिम संस्कार गरेर फर्किएको भन्दै उनले बास मागेकी थिइन् । बाढीका कारण विद्यालयमा पढाइ बन्द थियो । स्कुलमा होस्टल पनि चलिरहेकाले भान्सा कोठा र केही मान्छे सुत्ने ठाउँ पनि थियो । 

सचिले ती महिलालाई आश्रय दिइन् । त्यहाँ आश्रय लिन पुगेकी थिइन् उत्तरगया गाउँपालिका खाल्टेकी बुटी तामाङ । उनी गाउँको वडा सदस्य समेत थिइन् । खाल्टे गाउँ बाढीका कारण धेरै मानवीय क्षति हुने गाउँमध्ये एक हो ।

यहाँका हरेकजसो परिवारले परिवारको कुनै न कुनै सदस्य गुमाएको छ । कति बालबच्चा टुहुरा भएका छन् । कति ज्येष्ठ नागरिक सहाराविहीन भएका छन् । 

सचिले स्कुलमा बास दिन मञ्जुरी दिएपछि बुटी बाढीबाट जोगिएका अरु गाउँलेलाई पनि बोलाइन् । अहिले यो स्कुलमा आश्रय लिनेको संख्या १७० नाघिसकेको छ । जसमा ७० भन्दा धेरै बालबालिका छन् । 

२०७२ सालको भूकम्प अगाडिसम्म खाल्टेमा बाक्लो बस्ती थिएन । भूकम्पबाट घर भत्किनुका साथै गाउँमा बस्न असुरक्षित भएपछि रसुवाका मैलुङलगायतका केही गाउँका बासिन्दा खाल्टेमा आएर बसेका थिए । 

खाल्टेमा सरकारी जग्गामा बसेका उनीहरुले पक्की घर पनि बनाउन सकेका थिएनन् । टहरामै बसेका थिए । अहिले बाढीले त्यहाँको थातथलो पनि सबै बगाइदियो । त्यसैले खाल्टेका बासिन्दा नुवाकोटमै अस्थायी आश्रयमा बसेर सुरक्षित बसोबासस्थलको खोजीमा छन् ।

केही दिनपछि त विद्यालय खोल्नुपर्छ, सचिले आफ्नै विद्यार्थीलाई पढाउनुपर्छ, अनि होस्टलमा राख्नुपर्छ । यी बाढीपीडितलाई त्यतिबेला कहाँ पठाउने भन्ने उनलाई चिन्ता छ । बुटीलाई पनि स्कुल छाडेर अन्यत्र कहाँ जाने र गाउँलेलाई कहाँ लैजाने भन्ने चिन्ता थपिएको छ । 

बाँकी कुरा भिडियोमा हेर्नुहोस् :