'यो उमेरमा कहाँ जाऔं, बस्न पनि कसरी बसौं !'

भदौ १० गते भोटेकोशीमा आएको बाढीले धेरै क्षति पुर्‍याएको ठाउँ हो नुवाकोटको वेत्रावती बजार । 

बेत्रावती बजार ठूलो व्यापारिक केन्द्रको रुपमा विकास हुँदै गइरहेको थियो । उत्तरगया धामको रुपमा यो ठाउँको धार्मिक महत्व पनि उत्तिकै थियो । उत्तरगयामा गएर श्राद्ध गरेमा पितृ उद्दार हुन्छ भन्ने मान्यता छ । 

रसुवा र नुवाकोटको संगममा रहेको यो ठाउँको आधार बजार रसुवातिर र आधा नुवाकोटतिर पथ्र्यो । अहिले हेर्दा बजारको धेरैजसो भाग बगर बनेको छ । नुवाकोटतर्फ बजारको कुनामा केही घरमात्र बचेका छन् । गल्छीदेखि रसुवागढी जोड्ने डबल लेनको पक्की बाटोको नाम निशान देखिँदैन । 

बेत्रावतीका पूर्णबहादुर डंगोलको घर पनि बाढीले बस्न नमिल्ने बनाइदिएको छ । उनले भुइँचालोपछि बनाएको पक्की घरमा अहिले नदीले हिलो थुपारिदिएको छ । पहिला सडकको माथिल्लो साइडमा रहेको घर अहिले बगरको बीचमा रहेको जस्तो देखिन्छ । 

बेत्रावती बजारका धेरै मानिस बाढीमा बगेर बेपत्ता भएका छन् । भागेर ज्यान जोगाएका धेरै मानिसहरु पनि काठमाडौं र अन्यत्र आफन्तकोमा आश्रय लिइरहेका छन् । अन्यत्र आफन्त नभएका र गाउँ छाड्न मन नभएकाहरु गाउँदेखि १५ मिनेट माथि बनाइएको होल्डिङ सेन्टरमा बसिरहेका छन् । 

पूर्णबहादुरको घरमा पनि अहिले मान्छे बस्न सक्ने स्थिति छैन, उनी पनि होल्डिङ सेन्टरमा बस्छन् । दिनमा एक फेर वेत्रावती झर्छन्, घर वरपर केही अत्यावश्यक वस्तु भेटिन्छ कि भनेर खोजीनिति गरिरहन्छन् । जीवनका ६७ वर्ष उनले यहीँ बेत्रावतीमा बिताए । उनीहरुको परिवार यहाँ बसोबास गर्न थालेको चार पुस्ता भयो । 

बाढीले बगर बनाइदिए पनि अब यो उमेरमा उनलाई बेत्रावती छाड्न मन छैन तर यहाँ बस्ने पनि कसरी, पूर्णबहादुर दोधारमा छन् । 

विस्तृत विवरणका लागि भिडियो हेर्नुहोला :