रक्षाबन्धनमा काठमाडौं आउँदै थिए अनुज : दाइले खोजिरहेका छन्, रसुवादेखि चितवनसम्म 

सर्लाहीका अनुजकुमार मेहता रसुवास्थित त्रिशुली थ्री बी हब सबस्टेशनमा वेल्डिङको काम गर्थे । 

उनका दाइ मनिषकुमार मेहता पनि काठमाडौंको चोभारस्थित एक सब स्टेशनमा वेल्डिङको काम गर्छन् । 

भदौ ९ गते साँझ दाजुभाइका बीचमा कुराकानी भएको थियो । मनिषले भाइलाई भदौ १२ गते पर्ने रक्षाबन्धनका लागि भाइलाई काठमाडौंमा बोलाएका थिए । 

उनीहरुका आफ्नै दिदी बहिनी छैनन् । मामाकी छोरीहरु काठमाडौंमा भएकाले सबै जना जम्मा भएर रक्षाबन्धन मनाउने सल्लाह थियो । 

तर फोनमा कुराकानी भएको भोलिपल्टै भोटेकोशी नदीमा बाढी आयो । त्यसपछि अनुजकुमार सम्पर्कविहीन छन् । 

दाइ मनिषका अनुसार अनुजको ड्युटी बिहान ७ बजेदेखि बेलुकी ६ बजेसम्म थियो । त्यसैले बाढी आएका बेला भाइ ड्युटीमै रहेको हुन सक्ने उनको अनुमान छ । यद्यपि बाढी आएको थाहा पाएर भागेको हुन सक्ने आशा उनलाई छ । मोवाइल ट्रेसिङ गर्दा त्रिशुली थ्री बी को हब सबस्टेशनमै देखाएको छ । 

घरमा देवी देउतालाई हेराउँदा मान्छे जिउँदै छ भनेको छ । ‘मान्छे जिउँदै छ, खाली फेला पर्न नसकेको हो, भाइ भएको ठाउँमा मान्छे पुग्न सकेको छैन भन्छ’, मनिषले भने । 

भदौ १० गते बाढी आएदेखि मिलनको परिवार र आफन्त अनुजको खोजीमा जुटेका छन् । भदौ १० गते नै रसुवाबाट घाइतेहरु टिचिङ अस्पतालमा ल्याएपछि उनीहरु त्यहाँ पनि पुगे । तर टिचिङमा भेटिएनन् । उनीहरु नुवाकोटस्थित नेपाली सेनाको नम्बर १ सैन्य तालिम केन्द्रमा पनि पुगे । रसुवा बाढीमा उद्दारको काम सेनाले यही ब्यारेकमार्फत गरिरहेको छ । 

बाढीले बगाएका धेरैको शव चितवन र नवलपरासीतिर भेटिएको छ । ती शवहरु भरतपुर अस्पतालमा ल्याएकाले कोही आफन्त चितवनमा पनि बसेका छन् । कोही रसुवा जाने प्रयासमा छन् । तर रसुवा जान सजिलो छैन, बाढीले पुल र सडक सबै बगाएको छ । 

अनुज रसुवामा काम गर्न गएको जम्मा ३ महिना भयो । सरकारले उद्दारको काम अझै जारी राखेको छ । विभिन्न विद्युत आयोजनाको सुरुङबाट मानिसहरु जिउँदै उद्दार भइरहेको छ । त्यसले पनि आफन्त सम्पर्कविहीन भएकाको परिवारलाई आफ्ना मान्छे भेटिने आशा बढिरहेको छ । 

हेर्नुहोस् भिडियो :