मन्त्री अधिकारीलाई शिक्षा मन्त्रालयको पनि जिम्मेवारी

प्रधानमन्त्री केपी शर्मा ओलीले शिक्षा, विज्ञान तथा प्रविधि मन्त्रालयको जिम्मेवारी भूमि व्यवस्थामन्त्री बलराम अधिकारीलाई दिएका छन् ।

शिक्षामन्त्री विद्या भट्टराईले राजीनामा दिएपछि ओलीले उक्त मन्त्रालयको जिम्मेवारी अधिकारीलाई दिएका हुन् । 

प्रधानमन्त्रीको सचिवालय स्रोतका अनुसार ओलीले शिक्षा मन्त्रीको जिम्मेवारी अधिकारीलाई दिएको पत्र संसद सचिवालयमा पठाएका छन् । यसको औपचारिक जानकारी वैशाख १२ गते संसद अधिवेशन सुरु भएको दिन सभामुख देवराज घिमिरेले संसदलाई गराउनेछन् । 

विद्यालय शिक्षा ऐन जारी गर्न माग गर्दै शिक्षकहरु २२ दिनदेखि आन्दोलनमा छन् । शिक्षक आन्दोलनकै बेला शिक्षामन्त्री भट्टराईले वैशाख ८ गते सोमबार राजीनामा दिएकी थिइन् ।