लघुवित्त पीडित भन्छन् : माग पूरा नभए फेरि संसद छिर्छौं

लघुवित्त वित्तीय संस्थाका ऋणीहरुले काठमाडौं केन्द्रित आन्दोलन गरेको ४० दिन भयो । उनीहरु कहिले माइतीघर मण्डलमा धर्ना दिन्छन् त कहिले अर्धनग्न जुलुस निकाल्छन् । 

उनीहरुको एउटै माग छ, सरकार र लघुवित्तका ऋणीहरुबीच २०८० चैतमा भएको सहमति कार्यान्वयन । 

त्यतिबेलाको मुख्य सहमति भूकम्प, नाकाबन्दी र कोरोना महामारीका कारण ऋण तिर्न नसकेकाहरुको समस्या सम्बोधन गर्न स्थलगत अध्ययन गर्ने भन्ने थियो । 

अनि लघुवित्तले लिने सेवा शुल्क घटाउने विषयमा अध्ययन गर्ने पनि सहमति थियो । तर सरकारसँग भएको सहमति कार्यान्वयन नहुँदा भूकम्प, नाकाबन्दी र कोरोना महामारी जस्ता समस्याका कारण किस्ता तिर्न नसकेकाहरुमाथि धरपकड भइरहेको लघुवित्त पीडितहरुको भनाइ छ ।  

सरकारले उक्त प्रतिवेदन कार्यान्वयन नगर्दा धेरै लघुवित्त पीडितहरु अहिले पनि घर छाडेर भाग्नुपरेको उनीहरुको भनाइ छ । 

नवलपरासीकी गीता परियार अहिले पनि ७ वटा लघुवित्तको ऋणी छिन् । सुरुमा एउटा लघुवित्तबाट ऋण लिएकामा आफ्नो आर्थिक स्थिति बिग्रदै जाँदा अहिले ७ वटाबाट ऋण लिएको उनले बताइन् । उनले लघुवित्तको ऋण तिर्न गाउँमा पनि ऋण खोज्ने गरेकी छन् । 

लघुवित्तहरुले अहिले पनि गाउँमा किस्ता तिर्न नसक्नेहरुको खेतीबाली र भाँडाकुँडा उठाइरहेको दाङका कृष्णबहादुर सुनारले बताए । 

उनका अनुसार यसरी लघुवित्तका कर्मचारीले लगेका सामानहरुको मूल्यांकन भने नभएको उनको भनाइ छ । 

गतवर्ष लघुवित्तका ऋणीहरुको एक समूह संसद भवनभित्रै प्रदर्शन गर्न पुगेको थियो । माग पूरा नभए यसवर्ष पनि संसद छिर्ने उनीहरुले चेतावनी दिएका छन् ।  थप विवरण भिडियोमा :