काठमाडौं महानगरका तत्कालिन प्रमुख प्रशासकीय अधिकृत परियारविरुद्ध भ्रष्टाचार मुद्दा

अख्तियार दुरुपयोग अनुसन्धानले काठमाडौं महानगरपालिकाका तत्कालिन प्रमुख प्रशासकीय अधिकृतसहित ७ जनाविरुद्ध भ्रष्टाचार मुद्दा लगाएको छ । 

बुधबार अख्तियारले महानगरपालिकाका यसअघिका प्रमुख प्रशासकीय अधिकृत प्रदीप परियार, निर्देशक रविनमान श्रेष्ठ, शिवराज अधिकारी, बसन्त आचार्य, नमराज ढकाल, सहायक निर्देशक उत्तम दाहाल र इन्जिनियर जनार्दन गिरीविरुद्ध भ्रष्टाचार मुद्दा दायर गरेको हो । 

उनीहरुमाथि सामाखुशी करिडोर अन्तर्गत बसुन्धरादेखि म्हेपीसम्मको ढल निर्माणको ठेक्कामा भ्रष्टाचार गरेको आरोप छ । यो ठेक्का समानान्तर सेवा प्रालिलाई नदिनका लागि ठेक्कामा पेन्डिङ लिटिगेसन नहुने विषयलाई पेन्डिङ लिटिगेसन रहेको भनी अपव्याख्या गरेको अख्तियारको भनाइ छ  । उनीहरुले मनसायपूर्वक नै गलत मूल्यांकन प्रतिवेदन खडा गरी समानान्तरलाई ठेक्का नदिएको अख्तियारको भनाइ छ । 

यो ठेक्कामा कल्पवृक्ष कोहिनुर जेभीले २२ करोड ४० लाख ९४ हजार ६१२ रुपैयाँ ९५ पैसा प्रस्ताव गरेको थियो । समानान्तरले १८ करोड ९ लाख २२ हजार ३२५ रुपैयाँ ६३ पैसा कबोल गरेको थियो । तर समानान्तरलाई अयोग्य देखाएर कल्पवृक्षलाई ठेक्का पारेको अख्तियारको दाबी छ ।  

यसरी उनीहरुले कम कबोल गर्नेलाई नदिएर बढी कबोल गर्नेलाई ठेक्का दिएर ४ करोड ३१ लाख ७२ हजार २८७ रुपैयाँ ३२ पैसा सरकारलाई घाटा गराएको अख्तियारको भनाइ छ । 

अख्तियारले उनीहरुविरुद्ध ४ करोड ३१ लाख ७२ हजार २८७ रुपैयाँ ३२ पैसा बिगो दाबी गर्दै भ्रष्टाचार मुद्दा दायर गरेको हो ।