एसीसी यू–१६ इष्ट जोन कप : सिंगापुरलाई नेपालले ६ विकेटले हरायो

नेपालले सिंगापुरलाई ६ विकेटले पराजित गरेको छ । र, मलेसियामा सुरु भएको एसीसी यू–१६ इष्ट जोन कपमा सुखद सुरुवात गरेको छ । 

टस जितेर पहिले ब्याटिङ गरेको सिंगापुरले कप्तान रियान नाइकले अर्धशतकको मद्दतमा ३६.१ ओभरमा सबै विकेट गुमाएर १३८ रन बनायो ।

नेपालका लागि कप्तान विपिन शर्माले ४ विकेट लिए भने सचिन भट्टले ३ विकेट हात पारेका थिए ।  

१३९ रनको लक्ष्य नेपालले ३३.३ ओभरमा मात्र ४ विकेट गुमाएर भेट्टायो । ओपनर प्रसिद्ध जैसीले ५५ रनको नटआउट पारी खेले । 

अर्का ओपनर सूर्यांशु कोइराला मात्र ९ रनमा रिटायर्ड हर्ट भएका थिए । उनको स्थानमा आएका शिवांश बजगाईंले ३० रनको साझेदारी गरे । शिवांश ९ रनमा आउट भए । 

तर रौनक श्रीवास्तवले राम्रो साथ दिए । दुबैले दोस्रो विकेटका लागि ६३ रनको साझेदारी गर्दै नेपालको जितको आधार तयार पारे । रौनक ४० रनमा आउट भए । 

त्यसपछि नेपालले थप दुई विकेट गुमायो, तर शुभम खनालसँग मिलेर प्रसिद्धले अविजित रहँदै नेपाललाई ६ विकेटको जित दिलाए । शुभम र प्रसिद्धले पाँचौं विकेटका लागि अविजित २७ रनको साझेदारी गरे ।

९७ बलको सामना गरेका प्रसिद्ध ५५ रनमा अविजित रहे । शुभम ९ रनमा नटआउट रहे ।