हरित जलवायु कोषबाट नेपालले ५ अर्ब पाउने

हिमताल विस्फोटबाट हुनसक्ने क्षति कम गर्न नेपालले हरित जलवायु कोषबाट ५ अर्ब नेपाली रुपैयाँ बराबरको अनुदान पाएको छ ।

पपुवा न्युगिनीमा बसेको हरित जलवायु कोषको बोर्ड बैठकले ३६ दशमलव १ मिलियन अमेरिकी डलर अर्थात झन्डै ५ अर्ब नेपाली रुपैयाँको १५ बर्षे परियोजना स्वीकृत गरेको हो । यो हरित जलवायु कोषले उपलब्ध गराएको पहिलो र सबैभन्दा ठूलो सहयोग हो ।

यो परियोजनामा पहिलो चरणको ७ वर्ष हरित जलवायु कोषले उपलब्ध गराएको अनुदानबाट कार्यक्रम सञ्चालन हुनेछ । दोस्रो चरणको ८ वर्ष नेपाल सरकारले अन्य निकायसँगको सहलगानीमा परियोजना अघि बढाउनुपर्ने छ ।  

पछिल्लो ८ वर्षमा करिव १३ दशमलब ९ मिलियन अमेरिकी डलर अर्थात करिव २ अर्ब नेपाली रुपैयाँ बराबरको कार्य गरिने अनुमान गरिएको छ । यसबाहेक परियोजनाले समेटेका स्थानीय सरकारसहित अन्य संवद्ध विभाग, निकाय तथा मन्त्रालयले पनि समानान्तर आर्थिक दायित्व लिनेछन् ।

च्छो रोल्पा र इम्जा हिमताल संरक्षणमा प्राप्त गरेको सफलतापछि यो अनुदान प्राप्त भएको उर्जा जलस्रोत तथा सिँचाइ मन्त्रालयकी सचिव सरिता दवाडीले बताइन् । जल तथा मौसम विज्ञान विभागका महानिर्देशक कमलराम जोशीले जलवायु परिवर्तनको उच्च जोखिममा रहेका हिमताल विष्फोटबाट हुने क्षति कम गर्ने कार्यका लागि प्राप्त अनुदान नेपालका लागि निकै महत्वपुर्ण रहेको बताए ।