मलेसियालाई हराउँदै नेपाल एसीसी यू–१६ इष्ट जोन कप क्रिकेटको फाइनलमा

मलेसियामाथि ९ विकेटको शानदार जित हात पार्दै नेपाल एसीसी यू–१६ इष्ट जोन कप क्रिकेटको फाइनलमा पुगेको छ । 

क्वालालम्पुरमा घरेलु टोली मलेसियाले ९१ रनको लक्ष्य दिएको थियो, जुन नेपालले मात्र ११.४ ओभरमा एक विकेट गुमाएर पुरा गर्‍यो । 

नेपालका लागि परिमार्जन यादवले अविजित ५९ रनको अर्धशतकीय पारी खेले । मात्र ३५ बलको सामना गरेका उनले ५ चौका र ५ छक्का हानेका थिए । 
शिवांश बजगाईंले नटआउट २३ रन जोडे । 

सुरुमा टस हारेर व्याटिङको निम्तो पाएको मलेसियाले ४३.१ ओभरमा ९० रन जोड्दा सबै विकेट गुमाएको थियो । उसका लागि मोहम्मद फतुल मुइनले सर्वाधिक ३८ रन बनाएका थिए । 

मलेसियालाई सस्तैमा समेट्ने क्रममा अभय यादवले सर्वाधिक ४ विकेट लिए । शुभम खनालको नाममा ३ विकेट रह्यो । कप्तान विपिन शर्मा र सचिन भट्टले एकएक विकेट लिए । 

अब नेपालले उपाधिका लागि हङकङ र सिंगापुरमध्ये एकसँग खेल्ने छ ।