मध्यरातमा ससुराली आए, सालीको हत्या गरेर फरार 

सुनसरीको हरिनगर गाउँपालिका–६ महरम चोकका गफार मियाको घरका सबै जना राति मस्त निद्रामा थिए । आइतबार राति साढे २ बजे घरभित्रै एक्कासी गोली चल्यो । 

के भयो भनेर सबैजना ब्युँझिएर हेर्दा घरभित्र सुतिरहेकी गफारकी साइली छोरी १८ वर्षकी अरसी खातुनलाई गोली लागेको रहेछ । टाउको र गालामा गोली लागेकी उनको घटनास्थलमै मृत्यु भयो । 

उनलाई गोली हान्ने व्यक्ति कोही नभएर उनकै जेठो भिनाजु आजाद मियाँ थिए । उनको घर सीमापारी करिब ५०० मिटर टाढा भारतीय भूमिमा हो । 

आइतबार राति अरसी र उनकी माइली दिदी सँगै सुतेका थिए । अरसीलाई गोली लागेपनि सँगै सुतेकी दिदीलाई भने केही भएको छैन । उनले नै गोली हान्ने व्यक्ति पहिचान गरेकी थिइन् । 

गफारकी जेठी छोरीको विवाह आजादसँग २०७० सालमा भएको थियो । 

घटना थाहा पाएपछि बिहान पौने ४ बजे प्रहरी टोली घटनास्थलमा पुगेको थियो । जिल्ला प्रहरी कार्यालय सुनसरीका प्रवक्ता प्रहरी नायब उपरीक्षक योगराज खतिवडाका अनुसार केही दिनअघि पनि आजाद ससुराली आएका थिए । 

उनले ससुरा गफारसँग १० हजार रुपैयाँ मागेका थिए । तर गफारले पैसा छैन भनेर फर्काइदिएका थिए । तर आइतबार राति एक्कासी आएर सालीलाई गोली हानेर फरार भएको देखिएको प्रहरीको भनाइ छ । 

गोली हान्नुको कारण भने अहिलेसम्म खुलेको छैन । यस विषयमा अनुसन्धान सुरु गरिएको डीएसपी खतिवडाले जानकारी दिए । 

गोली हान्ने व्यक्ति आजाद मियाँ भारतमा पनि चोरी मुद्दामा प्रहरीको फरार सूचीमा छन् । उनको खोजीका लागि जिल्ला प्रहरी कार्यालय सुनसरीले मातहतका सबै कार्यालयबाट प्रहरी परिचालन गरेको छ ।

प्रहरीले घटनास्थलमा सानो हतियारमा लाग्ने एउटा नपड्किएको गोली पनि फेला पारेको छ । मृतकको शव पोष्टमार्टमका लागि वीपी कोइराला स्वास्थ्य विज्ञान प्रतिष्ठान धरान पठाइएको छ ।