विवाहेत्तर सम्वन्धले निम्त्याएको दु:खान्त

आइतबार विहानपख साढे ३ बजेतिर धनुषाको जिरो माइलस्थित प्रहरी कार्यालयमा एउटा फोन आयो । र, भनियो, एपी होटलमा रगतले लतपत्तिएको मानिस छ । 

होटल र प्रहरी बिट नजिकै छ । खबर आएको  ३/४ मिनेटमै प्रहरी पुग्यो । एक युवक घाइते अवस्थामा छटपटाइरहेका थिए । प्रहरीले एम्बुलेन्स बोलायो, घाइतेलाई एम्बुलेन्समा राखेर जनकपुर प्रादेशिक अस्पताल पठाउँछ । 

तर उपचारका क्रममा विहान ७ बजेर ४५ मिनेटमा मृत्यु हुन्छ । 

धनुषा प्रहरीका अनुसार मृतक महोत्तरीका २८ वर्षीय विमलेश यादव हुन् । उनको हत्यामा संलग्न रहेको आरोपमा जुली झा पक्राउ परेकी छन् । प्रहरीले घटनाको अनुसन्धान भइरहेको बताएको छ । 

तर प्रारम्भिक अनुसन्धानले विवाहेत्तर सम्बन्धले निम्त्याएको घटना जस्तो देखिएको छ । एक अनुसन्धानमा संलग्न एक अधिकृतका अनुसार विमलेश दुई सन्तानका बाबु हुन् । 

तर उनी धनुषाकी जुली झासँग सम्बन्धमा रहेको देखिन्छ । विमलेशको ससुराली र जुलीको गाउँ एउटै हो । विवाह भएको केही वर्षपछि विमलेश र जुलीबीच चिनजान भएको देखिन्छ । 

यो अवधिमा विमलेश वैदेशिक रोजगारीका लागि विदेश गएर आए । त्यही बेला जुली र उनको निरन्तर कुराकानी हुने गरेको परिवारले थाहा पाए । सुरुमा विमलेशको परिवार र आफन्तले जुलीको परिवारलाई भेटेर सम्झाए । 

त्यति गर्दा पनि नभएपछि महोत्तरी प्रहरीमा उजुरी दिए । केटाकेटीले अबका दिनमा कुराकानी नगर्ने सहमति भयो । 

विमलेश फेरि विदेश गए । करिव ६ महिना अगाडि फर्किए । त्यसक्रममा परिवारका सदस्यहरले विमलेश र जुलीबीच सम्वाद भइरहेको थाहा पाए । फेरि परिवार र आफन्तले विमलेशलाई सम्झाए, जुलीलाई बिर्सिन आग्रह गरे ।

उनले आफूले विदेशमा भएको समयमा जुलीका लागि पैसा पठाएको, मोबाइल किनिदिएको सुनाए । ३३ वटा त भौचर नै देखाए । उनका अनुसार ७/८ लाख रकम र मोबोइल पठाएका छन् । यो फिर्ता गर्नुपर्ने उनको माग थियो । फोनलाई लिएर भएको विवादमा विमलेशलाई प्रहरी नियन्त्रणमा समेत परेका थिए । 

यो घटनापछि विमलेश र जुली टाढिएको आफन्तलाई लागेको थियो । उनीहरुले पनि विगत विर्सिएर घर परिवारमा ध्यान दिन सुझाएका थिए । तर आइतबार नसोचेको घटना भयो । जुलीकै कारण विमलेशले ज्यान गुमाउन पुगे ।

शनिबार राति विमलेश र जुली होटलमा भेटेका थिए । राति १० बजेर ५० मिनेटमा विमलेश र जुली एउटै मोटरसाइकलमा होटलमा पुगेका थिए । 

युवती बाहिर बस्छिन्, युवक भित्र गएर कोठा बुक गर्छन् । अनि, बाहिर आएर युवतीलाई लिएर पछाडिको बाटोबाट १०२ नम्बर कोठामा जान्छन् । 

यो सबै दृश्य सीसीभीटी क्यामेरामा कैद भएको छ । 

राति ३ बजेतिर एकाएक होटलको पिढीमा नग्न अवस्थामा विमलेश खस्छन् । रगताम्मे अवस्थामा रहेका उनी लडिरहन्छन् । त्यही बेला जुली भने चप्पल समेत नलगाएर भागेको देखिन्छ । 

केहीबेरमा प्रहरी आइपुग्छ । विमलेश हिँडेर नै एम्बुलेन्सससम्म जान्छन् । तर विहानपख उनको मृत्यु हुन्छ । आइतबार दिउँसो जुली, महोत्तरीको परौल जाने बाटोमा पक्राउ पर्छिन् । उनको साथबाट घटनामा प्रयोग भएको छुरा समेत बरामद भएको छ ।

प्रहरीले सोमबार जुलीलाई सार्वजनिक गरेको  छ । र, थप अनुसन्धान भइरहेको बताएको छ । 

तर विमलेशका आफन्तहरुले भने घटनामा जुली बाहेक अरुको पनि संलग्नता हुनसक्ने आशंका गरेका छन् । 

नेपाल शोको सम्पर्कमा आएका एक आफन्तका अनुसार विमलेश झण्डै ७० किलो तैल भएका व्यक्ति हुन् । जुली निकै दुब्ली र पातली छन् । अनि, विमलेश खसेको फुटेज हेर्दा माथिबाट एकभन्दा बढी मानिसको. सलग्नता हुनसक्ने आशंका छ । सीसीटीभी फुटेजमा पनि केही पुरुष बोलेको आवाज सुनिएको छ ।

त्यसैले यसमा अरुको पनि संलग्नता हुनसक्ने आफन्तहरु बताउँछन् । होटलको बुकिङ रेकर्डमा समेत अरुको नाम उल्लेख नभएकाले होटल सञ्चालकहरुमाथि समेत अनुसन्धान गर्नुपर्ने र दोषीलाई कडा कारबाही गर्नुपर्ने आफन्तको माग छ ।

भिडियो हेर्नुस्