आन्दोलनका नाममा आगजनी योजनावद्ध षड्यन्त्र हुनसक्छ : प्रधानमन्त्री कार्की

२९ भदौ, काठमाडौं । प्रधानमन्त्री सुशीला कार्की सिंहदरबार, सर्वोच्च अदालत लगायतका संस्थाहरुमा भएको आगजनी योजनावद्ध षड्यन्त्र हुनसक्ने आशंका गरेकी छन् । उनले यसमा संलग्नहरुलाई कारबाही गर्नुपर्नेमा जोड दिएकी छन् ।

पदभार ग्रहणपछि सचिवहरुलाई सम्बोधन गर्दै प्रधानमन्त्री कार्कीले मुलुकका लागि आवश्यक संस्थाहरुमाथि छानिछानी प्रहार भएको बताइन् ।

‘अदालतका फाइलहरु जले । सिंहदरबार कयौं फाइलहरु नष्ट भए’, उनले भनिन्, ‘योजनावद्ध षड्यन्त्र भएको हो कि भन्ने लाग्छ । यसरी प्रहार गर्नेहरुलाई कारबाही हुनुपर्छ’, उनले भनिन् । 

उनले नेपालमा यस खालको घटना पहिलो पटक भएको बताइन् । आन्दोलनका क्रममा भएको सरकारी सम्पत्तिको हानी नोक्शानीको अनुसन्धान गर्ने प्रधानमन्त्री कार्कीले बताएकी छन् ।

‘यसरी नोक्शान गर्नेहरुलाई छोड्नुपर्ने अवस्था छैन, खोजबिन तलास हुनुपर्ने अवस्था छ’, उनले  भनिन् ।