आन्दोलनमा गोली लागेका दीपेन्द्र : हातखुट्टा चल्दैन, बोल्न सक्दैनन्

दैलेखका २८ वर्षका दीपेन्द्र बस्नेत काठमाडौंमा घर वाइरिङको काम गर्थे । उनी विदेश जाने योजनाले काठमाडौं आएका थिए । तर समय लाग्ने भएपछि जीविका चलाउन वाइरिङको काम गरिरहेका थिए । 

घरको आर्थिक अवस्थाका कारण उनले धेरै पढ्न पाएनन् । आफ्नो छोरालाई भने राम्रो शिक्षा दिन चाहन्छन् । त्यसैले केही पैसा जोहो गर्न विदेश जान खोजेका थिए । 

भदौ २३ गते जेनजी पुस्ताले भ्रष्टाचारको विरोध गर्दै आयोजना गरेको प्रदर्शनमा उनी पनि गए । नयाँ बानेश्वरमा संसद भवन अगाडि उनलाई टाउकोमा गोली लाग्यो । 

सुरुमा संसद भवन नजिकैको सिभिल अस्पतालमा उपचारका लागि लगियो । त्यहाँ उपचार सम्भब नभएपछि अन्नपूर्ण न्यूरो अस्पताल लगियो । 

अहिले उनी दाहिने आँखाले देख्न सक्दैनन् । राम्रोसंग आँखा खोल्न पनि सक्दैनन्, उनको देब्रे हात र खुट्टा पनि चल्दैन । 

अस्पतालमा उनकी श्रीमती र सानो छोरा छन्, दीपेन्द्रलाई तत्काल अस्पतालबाट घर लैजान सक्ने अवस्था छैन । ६ महिनादेखि एक वर्षसम्म अस्पतालमै राखेर उपचार गर्नुपर्ने उनकी श्रीमती संगीता बताउँछिन् । 

घरखर्च चलाउने श्रीमान नै हिँड्न र बोल्न नसक्ने अवस्थामा पुगेपछि सबै जिम्मेवारी संगीतामाथि आएको छ । सानो छोरालाई मृगौलासम्बन्धी समस्या छ । यस्तो अवस्थामा आफूलाई खर्च टार्न सक्ने रोजगारी मिलोस् भन्ने उनको चाहना छ । 

दीपेन्द्रलाई भेट्न जेनजी पुस्ताका युवाहरु बेलाबेलमा अस्पताल आउँछन् । तर उनलाई सरकार पक्षबाट पनि कोही आइदेओस् र आफ्नो पीडा सुनाउन पाइयोस् भन्ने लागेको छ । 

प्रधानमन्त्री सुशीला कार्की घाइतेहररुलाई भेट्न अस्पताल पुगेको संगीताले सामाजिक सञ्जालमा देखेकी छन् । 

गम्भीर घाइते आफ्ना श्रीमान अन्नपूर्ण न्यूरोमा छन् भन्ने थाहा नभएर नआएको हो कि भन्ने संगीतालाई लागेको छ । लामो समयसम्म अस्पतालमै राखेर उपचार गराउन पर्ने भएपछि अहिले बनेको सरकारमाथि संगीताले ठूलो आशा राखेकी छन् । 

सरकारले आन्दोलनका घाइतेको निशुल्क उपचार गर्ने भनेको छ । तर अहिलेसम्म सरकारका कोही पनि प्रतिनिधि नआएका कारण उनी अन्योलमा परेकी छन् । अहिलेसम्म अस्पतालमा लागेको खर्च उनी आफैंले तिरिरहेकी छन् ।