नियुक्तिको २६ दिनमै फ्रान्सका प्रधानमन्त्रीले दिए राजीनामा 

फ्रान्सका प्रधानमन्त्री सेबस्टाइन लेकोर्नुले नियुक्तिको एक महिना नबित्दै राजीनामा दिएका छन् । अहिलेको अवस्थामा आफूले प्रधानमन्त्रीको दायित्व निर्वाह गर्न नसक्ने भन्दै उनले राजीनामा दिएका हुन् । 

सोमबार बिहान प्रधानमन्त्री लेकोर्नुले राष्ट्रपति इम्मानुयल म्याक्रोंसँग करिब एक घण्टा कुराकानी गरेका थिए । लेकोर्नुले फ्रान्सको प्रधानमन्त्री पद सम्हालेको जम्मा २६ दिन भएको छ । उनले मन्त्रिपरिषद गठन गरेको जम्मा एक दिन मात्र भएको छ । 

संसदमा रहेका राजनीतिक दलहरुले उनले बनाएको मन्त्रिपरिषदको कडा आलोचना गरेका थिए । यसअघिका प्रधानमन्त्री फ्रान्स्वा बायरु मन्त्रिपरिषदकै सदस्यहरु दोहोरिएपछि दलहरुले आलोचना गरेका थिए ।

धेरै दलहरुले अहिले फ्रान्समा अर्लि इलेक्सनको पक्षमा छन् । केहीले राष्ट्रपति इम्मानुयल म्याक्रोंको राजीनामा पनि मागेका छन् । तर राष्ट्रपति म्याक्रोंले सन् २०२७ मा आफ्नो कार्यकाल पूरा हुनुभन्दा पहिला राजीनामा नदिने बताएका छन् । 

अब राष्ट्रपति म्याक्रोंसँग तीनवटा मात्र विकल्प छ, उनले अर्को प्रधानमन्त्री नियुक्त गर्न सक्छन् । उनले संसद भंग गर्न सक्छन् वा आफैं राजीनामा दिन सक्छन् ।