आयुक्त र प्रमुख आयुक्तको राजीनामा माग्दै अख्तियार पुगे जेनजी प्रतिनिधि

जेनजी आन्दोलनमा सहभागी एक समूहले प्रमुख आयुक्त र आयुक्तहरुको राजीनामा माग गर्दै अख्तियार दुरुपयोग अनुसन्धान आयोगको कार्यालय बाहिर प्रदर्शन गरेको छ । 

मंगलबार जेनजी प्रतिनिधिहरुले अख्तियारका प्रमुख आयुक्त प्रेमकुमार राई र आयुक्तहरुलाई स्वेच्छिक राजीनामा दिन आग्रह गरेका हुन् । 

जेनजी आन्दोलनको प्रमुख मुद्दा भ्रष्टाचार र दण्डहीनताको अन्त्य हुनुपर्छ भन्ने रहेको भन्दै उनीहरुले अख्तियारका अहिलेका पदाधिकारीहरु यो भूमिका निर्वाह गर्न सक्षम नभएकाले स्वेच्छिक राजीनामा दिन आग्रह गरेको बताएका छन् । 

‘यो आयोगमा प्रश्न उठेका, निष्पक्ष नभएका आयुक्त र प्रमुख आयुक्त हुँदासम्म भ्रष्टाचार र दण्डहीनता अन्त्य हुने देखिएन’, मंगलबार अख्तियार पुगेका एक जेनजी प्रतिनिधि रिजन थापामगरले भने । 

अख्तियारका प्रमुख आयुक्त प्रेमकुमार राई विभिन्न मन्त्रालयको सचिव हुँदा सुरु भएको भ्रष्टाचार र अनियमितताका काण्डमा कुनै नै कुनै रुपमा जोडिएकाले उनको नेतृत्वमा अख्तियारले निष्पक्ष काम गर्न नसक्ने जेनजी प्रतिनिधिहरुको भनाइ छ ।

अख्तियारका पदाधिकारीहरुलाई बैधानिक रुपमा हटाउन संसदमा महाअभियोग प्रस्ताव दर्ता गर्नुपर्छ । तर अहिले संसद नभएकाले वैधानिक रुपमा हटाउन सम्भव छैन । त्यसैले उनीहरुलाई स्वेच्छिक रुपमा राजीनामा दिएर जेनजी आन्दोलनको आशा पूरा गरिदिन आग्रह गरेको जेनजी प्रतिनिधि अमित खनालले बताए ।