खुल्यो अनौठो रिसोर्ट, जहाँ खानपिनसँगै उपचारको पनि सुविधा छ

चीनको अधिनमा रहेको सानो देश मकाउ जुवाका लागि संसारभर प्रसिद्ध छ । 

यो सानो देशमा करिब साढे ६ लाख मानिसहरु बसोबास गर्छन्, तर जुवा खेल्न संसारभरका मानिसहरु यही ठाउँलाई रोज्छन् । 

मकाउले जुवाका लागि अमेरिकाको लस भेगासलाई पछि पारेको २० वर्ष भइसक्यो । 

अहिले यही मकाउ शहरले अर्को पनि रेकर्ड बनाएको छ, विश्वकै पहिलो रिसोर्ट हस्पिटल सञ्चालन गरेर । 

हङकङको आइर्‍याड हस्पिटलले मकाउमा मेल्को रिसोर्ट एण्ड इन्टरनेनमेन्टसँग मिलेर अत्याधुनिक रिसोर्ट हस्पिटल सञ्चालनमा ल्याएको छ । यो रिसोर्ट हस्पिटलको गत सोमबार उद्घाटन गरिएको छ । 

१५ हजार स्क्यायर फिटमा फैलिएको मेल्को रिसोर्टमा ६ वटा क्यासिनो सञ्चालनमा छ । त्यसमध्ये एउटामा स्वास्थ्य उपचार सेवा पनि दिने गरी पहिलो रिसोर्ट हस्पिटल सञ्चालनमा ल्याइएको छ । जहाँ सिटीस्क्यान, एमआरआईजस्ता उपकरणहरु पनि राखिएको छ । 

मकाउ जुवाका लागि त प्रख्यात भइहाल्यो, तर पछिल्लो समय यसले हेल्थ टुरिजमको पनि केन्द्र बन्ने प्रयास गर्दैछ । 

फुर्सदको समय बिताउन मकाउ आएका पाहुनाहरुलाई एउटै छनामुनि स्वास्थ्य सेवा पनि दिने गरी रिसोर्ट होटल सञ्चालन गरिएको रिसोर्टका प्रमुख कार्यकारी अधिकृत लरेन्स हो ले बताएका छन् । 

रिसोर्ट हस्पिटलको नयाँ कन्सेप्टले चीन, हङकङ र अरु विदेशी पर्यटक पनि आकर्षित हुने अनुमान गरिएको छ । पर्यटकलाई लामो समय बस्न र धेरै खर्च गर्नका लाग रिसोर्ट हस्पिटलले प्रेरित गर्ने मेल्को रिसोर्टले बताएको छ । 

मकाउमा हरेक वर्ष करिब ४ करोड मानिसहरु आउने गरेका छन् । उनीहरुलाई स्वास्थ्य उपचारको राम्रो सेवा दिँदा मकाउ मेडिकल टुरिजमका लागि पनि प्रमुख गन्तव्य बन्न सक्ने आईर्‍याडका अध्यक्ष डेनिस टामको भनाइ छ । 

मकाउमा जुवा खेल्न चीन, हङकङ र एसियाका अरु देशबाट मानिसहरु आउने गरेका छन् । 

मकाउमा जुवा व्यवसाय फस्टाउन थालेको सन् २००० पछि हो । सरकारले मकाउलाई विश्वभरका क्यासिनो अपरेटरका लागि खुला गरेपछि यहाँ क्यासिनो व्यवसाय फस्टाउन थालेको हो । 
अहिले मकाउ सरकारको आम्दानीको प्रमुख स्रोत जुवा नै रहेको छ । 

कोरोना महामारीमा क्यासिनोहरु बन्द हुँदा मकाउको अर्थतन्त्रमा ठूलो धक्का लागेको थियो । 

त्यसैले महामारीपछि यहाँको सरकारले क्यासिनोमा मात्र भर नपरेर अन्य व्यवसाय र उद्योगको विकास र विस्तारमा जोड दिँदै आएको छ । 

त्यसका लागि मकाउ सरकारले सन् २०२३ मा डाइभर्सिफिकेसन प्लान ल्याएको थियो । 

जसमा शहरका एकै ठाउँमा पर्यटनसँगै अन्य सेवाहरु पनि दिन सक्ने सेन्टरहरु स्थापना गर्न प्रोत्साहन गर्दै आएको छ । 

त्यसपछि स्वास्थ्य सेवा, सूचना प्रविधि र इभेन्टहरु पनि मकाउमा फस्टाउँदै गएको छ । 

गत वर्ष मकाउमा क्यासिनोको राजस्व लगभग एक चौथाइले बढेर २८.३ बिलियन डलर पुगेको थियो । 

विश्वमा मेडिकल टुरिजम दशौं अर्ब डलरको छ । यो उद्योग अझै विस्तारकै चरणमा रहेको पनि व्यवसायीहरु बताउँछन् । त्यसैले मेडिकल टुरिजममा गरेको लगानी खेर नजानेमा व्यवसायी ढुक्क छन् । 

एसिया मेडिकल टुरिजमको मुख्य हब हो । अहिले धनी मानिसहरु कस्मेटिक सर्जरीका लागि दक्षिण कोरिया जान्छन् भने अरु धेरैथरि उपचारका लागि सिंगापुर जाने गरेका छन् । 

मेडिकल टुरिजमका लागि भारतका अस्पतालहरु पनि प्रमुख गन्तव्य हुन् । किनकी त्यहाँको उपचार सेवा पश्चिमा मुलुकको भन्दा धेरै सस्तो रहेको छ ।