ट्रम्प होइन, मचाडोलाई नोबेल शान्ति पुरस्कार

गाजाको शान्ति योजनाको प्रथम चरणमा यस्तो बेला उल्लेख्य प्रगति भएको थियो, जतिबेला नोबेल शान्ति पुरस्कारको घोषणा हुने समय भएको थियो ।

अमेरिकी राष्ट्रपति डोनाल्ड ट्रम्पले अगाडि सारेको २० बुँदे शान्ति योजनाको पहिलो चरणलाई इजरायल र हमास दुबैले अनुमोदन गरेका छन् । अब सबै बन्धक रिहा हुनेछन्, अनि मानवीय सहायता फेरि गाजा पुग्नेछ ।

यो सहमतिका पछाडि राष्ट्रपति ट्रम्पको भूमिका महत्वपूर्ण रह्यो । उनले हमास मात्र होइन, इजरायललाई पनि दबाव दिए । उनी युद्ध रोक्न मात्र होइन, नोबेल शान्ति पुरस्कारबाट पुरस्कृत हुन चाहन्छन् ।

शुक्रबार नोबेल शान्ति पुरस्कारको घोषणा पनि भयो । तर पुरस्कार समितिले ट्रम्प होइन, भेनेजुएलाकी राजनीतिकर्मी मारिआ कोरिना मचाडोलाई रोज्यो ।

पुरस्कार समितिले मचाडोलाई आँटिली र शान्तिप्रति प्रतिवद्ध अगुवा भनेको छ र, उनले प्रजातन्त्रका पक्षमा निर्वाह गरेको भूमिकाका लागि पुरस्कृत गरिएको बताएको छ ।

नोबेल समितिका अध्यक्ष जोर्गेन वाटने फ्राइडनेसले मचाडो दक्षिण अमेरिकामा सहासको असाधारण उदाहरण भएको बताएका छन् ।

५८ वर्षकी मचाडो भेनेजुलएलाकी विपक्षी नेता हुन् । दुई पटक संसद सदस्य चुनिएकी उनी २०२४ मा राष्ट्रपतिको उम्मेदवार त थिइनन्, तर चुनावी अभियानभर विपक्षी नेताको भूमिका उनले नै निर्वाह गरेकी थिइन् ।

पछिल्लो समय निकोलस मुदुरो सरकारले उनलाई देश छाड्न रोक लगाएको छ ।