लिग गर्न नसक्ने हो भने एन्फा नेतृत्वको औचित्य छैन : फुटबल खेलाडी संघ

नेपाल फुटबल खेलाडी संघले अखिल नेपाल फुटबल संघ (एन्फा)को नेतृत्वका कारण दुई वर्षदेखि ए डिभिजन लिग हुन नसकेको भन्दै विरोध जनाएको छ । 

अहिलेको एन्फा नेतृत्वले फुटबलमाथि अन्याय गरिएको र लिग गर्न नसक्ने हो भने नेतृत्वमा बसिरहनु नैतिक नहुने पनि बताएको छ ।

फुटबल खेलाडी संघका अध्यक्ष बिक्रम लामाले मंगलबार एक विज्ञप्ति जारी गरी पुस ९ गतेदेखि तोकिएको ए डिभिजन लिग जसरी पनि सञ्चालन गर्न माग गरेको छ ।

‘यदि फेरि पनि विभिन्न कारण देखाई प्रतियोगिताका कार्यक्रमहरु परिवर्तन वा रोकिएको खण्डमा उत्पन्न हुने सम्पूर्ण अवस्थाको जिम्मेवारी अखिल नेपाल फुटबल संघले लिनुपर्नेछ’, विज्ञप्तिमा भनिएको छ । 

लिग नभएकै कारण एक सय भन्दा बढी खेलाडी रोजगारीका लागि विदेशिएको भन्दै खेलाडी संघले घरेलु फुटबल चलायमान बनाउन एन्फा नेतृत्वले विश्वास दिलाउन नसकेको बताएको छ । 

हेर्नुहोस् फुटबल खेलाडी संघको विज्ञप्ति