एयर इण्डिया विमान दुर्घटनाका एक्लो जिवित व्यक्तिको दुःख

१२ जुन २०२५ मा एयर इन्डियाको एउटा विमान दुर्घटना भयो । विमानमा सवार २४१ जनाको मृत्यु भयो । केवल एकजना व्यक्ति मात्र बाँच्न सफल भए । 

उनी हुन्, विश्वासकुमार रमेश । विश्वासकुमार आफूलाई दुनियाको सबभन्दा भाग्यशाली मानिस ठान्छन् । शारीरिक र मानसिक रूपमा अहिलेसम्म पनि गहिरो पीडामा छन् ।

१२ जुनमा भारतको अहमदाबादबाट लन्डनका लागि उडान भरेको बोइङ ७८७ विमान केही मिनेटमै दुर्घटनाग्रस्त भएको थियो । विमान नजिककैको बस्तीमा खस्यो । 

दुर्घटनाग्रस्त विमानबाट विश्वासकुमार जीवितै बाहिर निस्किँदै गरेको र उनको पछाडि बाक्लो धुवाँ उडिरहेको फोटो तथा भिडियो विश्वभर चर्चित भएको थियो । 

३९ वर्षीय विश्वासकुमार रमेश अहिले बेलायतमा छन् । उनले बीबीसीसँग भनेका छन्, ‘यो त एउटा चमत्कार हो कि म बाँचें । तर बाँचेर पनि मैले सबै कुरा गुमाएँ ।’

त्यही विमानमा विश्वासकुमारका कान्छा भाइ अजय पनि थिए, उनको दुर्घटनामा मृत्यु भयो । 

अहिले विश्वासकुमार पोस्ट ट्रामेटिक स्ट्रेस डिसअर्डर (पिटिएसडी) बाट ग्रस्त छन् । उनी आफ्नी श्रीमती र चार वर्षीय छोरासँग पनि ठीकठाकसँग कुरा गर्न सक्दैनन् ।

 दुर्घटनामा मृत्यु भएका आफ्ना भाइलाई सम्झिएर निकै भावुक भएका विश्वासकुमार भन्छन्, ‘पछिल्ला केही वर्षदेखि मेरो सबैभन्दा ठूलो सहारा नै भाइ थियो ।’

विश्वासकुमारले आफू अत्यन्तै पीडामा भएकाले त्यसदिनको घटनाबारे केही भन्न नसक्ने सुनाए । उनका अनुसार त्यो दिन सम्झिँदा मात्र पनि उनलाई असह्य पीडा हुन्छ । 

अन्तर्वार्ताका क्रममा धेरैपटक उनको आवाज भारी भएको थियो । उनले आफूलाई सम्हाल्न सकिरहेका थिएनन् ।

यो दुर्घटनापछि शारीरिक र मानसिक रूपमा धेरै कठिन भएको छ । मेरो परिवार पनि मानसिक रूपमा अत्यन्तै पीडामा छ । मेरी आमा चार महिनादेखि प्रत्येक दिन ढोका बाहिर बस्छिन्, कसैसँग कुरा गर्दैनन् । म पनि कसैसँग कुरा गर्न चाहन्नँ’ विश्वासकुमारले भनेका छन्, ‘म ठीकसँग हिँड्न पनि सक्दिनँ ।’

विश्वासकुमारले दुर्घटनामा पाएका केही चोटबारे पनि बताएका छन् । उनको घुँडा, खुट्टा, काँध, र ढाडमा अहिलेसम्म पनि पीडा छ । बिस्तारै श्रीमतीको सहारामा हिड्ने गरेका छन् ।

दुर्घटनाले उनीहरूको परिवारकै जीवन बदलिदिएको छ । दुर्घटना हुनु अघि विश्वासकुमार र उनका भाइ अजयले माछा व्यवसाय गर्थे, अब उक्त व्यवसय पूर्ण रूपमा बन्द भएको छ ।

दुर्घटनाग्रस्त विमानको कम्पनी एयर इन्डियाले उचित सहयोग नगरेको उनीहरुको गुनासो छ । 

एयर इन्डियाले विश्वासकुमारलाई क्षतिपूर्ति स्वरूप २१ हजार ५०० सय पाउण्ड दिने प्रस्ताव गरेको थियो, जुन उनले स्वीकार पनि गरेका छन् । तर यो रकम आवश्यकताअनुसार अत्यन्त कम भएको उनका निकटस्थका बताउँछन् ।