प्रचण्डको दाबी : एक नम्बर पार्टी बन्न कसैले रोक्न सक्दैन

विभिन्न १० वटा कम्युनिस्ट घटक मिलेर बनेको नेपाली कम्युनिस्ट पार्टीका संयोजक पुष्पकल दाहाल प्रचण्डले आगामी चुनावबाट देशकै ठूलो पार्टी बन्ने दाबी गरेका छन् । 

बुधबार काठमाडौंमा आयोजित एकता घोषणासभामा उनले आफूहरुलाई देशकै एक नम्बर पार्टी बन्न कसैले रोक्न नसक्ने दाबी गरे । 

‘देशको एक नम्बर पार्टी बन्न कसैले रोक्न सक्दैन, एक नम्बर पार्टी त भयो भयो । कसैलाई टाउको दुखेको पनि होला, राति निद्रा नलागेको होला । नलागे नलागोस्’, उनले भने । 

अब देशैभरि एकता घोषणा सभा लिएर गएपछि पार्टीको पक्षमा अझै माहोल बन्ने प्रचण्डले बताए । ‘हाम्रो आत्मसमीक्षा, हाम्रो प्रतिवद्धतालाई जनताले राम्रोसँग साथ दिनेछन्’, उनले भने । 

प्रचण्डले आफूहरु सधैं नेतृत्वमा बसिराख्नुपर्छ भन्ने पक्षमा नरहेको पनि बताएका छन् । ‘विचारको विकास गरौं, विधिको विकास गरौं, एउटा प्रणालीको विकास गरौं, इतिहासमा  महत्वपूर्ण भूमिका खेलेका नेताको सम्मान गर्ने प्रणाली विकास गर्ने हो भने नयाँ तरिकाले जान सकिन्छ’, उनले भने । 

बुधबार नेकपा माओवादी केन्द्र, एकीकृत समाजवादीलगायत विभिन्न कम्युनिस्ट घटक मिलेर नेपाली कम्युनिष्ट पार्टी बनेको छ । यो पार्टीको  सहसंयोजकमा माधवकुमार नेपाल रहेका छन् ।