किन घट्यो बैंकको नाफा ?

उद्योगी तथा पूर्वअर्थ राज्यमन्त्री डा. रुप ज्योतिले सिटिजन्स बैंक इन्टरनेसनलबाट लिएको ९० करोडको कर्जा संकटमा पर्‍यो । रुप ज्योतिले हिरो बाइक बेच्ने आफ्नो कम्पनीका लागि ऋण लिएका थिए, तर हिरोको आधिकारिक डिलरसिप सीजी ग्रुपले खोस्यो । 

ऋण लिएको व्यवसाय नै बन्द भएपछि राष्ट्र बैंकले त्यो कर्जामा शत प्रतिशत प्रोभजनिङ गर्न लगायो । प्रोभिजनिङ गर्नु भनेको ऋण संकटमा परिन्जेल ऋण बराबरकै पैसा बैंकले नाफामा हिसाब नगर्नु हो । 

यसैकारण चालु आर्थिक वर्षको साउनदेखि असोजसम्मको तीन महिनामा सिटिजन्स बैंकको वित्तीय विवरण नोक्सानीमा देखियो । बैंक २२ करोड ४ लाख ११ हजार रुपैयाँ नोक्सानी छ । 

अरु बैंकको वित्तीय विवरण पनि पहिलो त्रैमासमा खासै राम्रो छैन । १५ वाणिज्य बैंकको नाफा कमाए पनि गत वर्षको पहिलो त्रैमासको तुलनामा घटेको छ । विवरणअनुसार वाणिज्य बैंकहरुको खुद नाफा औसमै १८.७८ प्रतिशतले घटेको हो । 
बैंकहरुले तीन महिनामा १३ अर्ब १४ करोड रुपैयाँ मात्रै कामाए, गत वर्ष १६ अर्ब १८ करोड रुपैयाँ नाफा बुक गरेका थिए । 

सिटिजन्ससँगै कृषि विकास बैंक, एनआईएमबी, प्रभु, नेपाल एसबीआई र लक्ष्मी सनराइज बैंकको नाफा धेरै घटेको छ । एनएमबी, स्ट्यान्डर्ड चाटर्ड, माच्छापुच्छ्रे, सिद्धार्थ, नबिल, हिमालयन, नेपाल बैंक, प्राइम कमर्सियल र कुमारी बैंकको पनि नाफा गत वर्षभन्दा कम छ । 

जेनजी आन्दोलनपछि बैंकहरुले दिएको ऋणको किस्ता व्याज तिर्नेहरु कम भएका छन् । त्यसले बैंकको नाफामा प्रभाव परेको देखिन्छ । बैंकहरुले खराब कर्जामा धेरै कम प्रोभजिनिङ गर्नु परेकाले पनि नाफा खुम्चिन पुगेको हो । 

तर, यो तीन महिनामा सरकारी स्वामित्वको राष्ट्रिय वाणिज्य बैंकको नाफा भने ३ गुणाले बढेको छ । वाणिज्य बैकले ५९ करोड नाफा कमाएको छ । सबैभन्दा धेरै नाफा चाहिँ ग्लोबल आईएमई बैंकले १ अर्ब ८५ करोड कमाएको छ । सानिमा, एनआईसी एसिया र एभरेष्ट बैंक पनि गत वर्षभन्दा बढी नाफा कमाउने बैंक हुन् ।