तीन हप्तादेखि कष्ट भोग्दै हिमालयन बैंकका ग्राहक

एक दिन हैन, दुई दिन हैन, तीन हप्ता । हिमालयन बैंकले सिस्टम अपग्रेडका नाममा यो पटक सेवाग्राहीलाई हदैको दुःख दियो । 

आजको दिनमा मोबाइल बैंकिङ कति इम्पोर्टेन्ट छ ? यो त कसैले भनिरहनु पर्दैन । चिया खाएको पैसा पनि बैंकिङ एपबाटै तिर्ने बानी बसिसक्यो । गोजीमा पैसा बाकेर हिँड्न नै धेरैले छाडिसके । ईसेवा र खल्तीजस्ता इ–वालेटमा पैसा तान्न पनि मोबाइल बैंकिङ त चल्नुपर्छ । तर न मोबाइल बैंकिङ चल्छ, न इन्टरनेट बैंकिङ ।  

हिमालय बैंकले सूचना निकालेर कात्तिक ३ गतेदेखि १० गतेसम्म कोर बैंकिङ सफ्टवेयरलाई स्तरोन्नति गर्न लागिएकाले सीमति बैंकिङ सेवा मात्रै दिने जानकारी दिएको थियो । तिहार र छठजस्तो मुख्य चाडबाडकै बेलामा भएको पैसा चलाउन नपाएर मान्छे तनावमा परकै थिए । कात्तिक ११ पछि बैंकका शाखाहरुमा पुग्दा पनि सिस्टम ढिलो चल्दा लाइन लागेर मान्छेले थप सास्ती भोगे । 

सिस्टम अगग्रेड गर्नु र त्यसका समय माग्नु नराम्रो पनि हैन । एक हप्ता त होला भनेर मान्छे चुप लगेर बसेकै पनि हुन् ।

तर यो, त्यो बहानामा मोबाइल र इन्टरनेट बैंकिङ नचलेको तीन हप्ता हुन लाग्यो । अझै पनि बैंकमा जानकारी माग्दा बन्दैछ–बन्दैछ भनेर टारिँदैछ । ग्राहकहरुका अनुसार एक दुई दिनमा समस्या सबै हल हुन्छ भन्न थालेको नै दुई हप्ता भइसक्यो । 

आजको दिनमा बैंकिङ सेवा अनलाइनमा निर्भर छ । त्यही अनलाइन सेवा लिन नपाइने हो भने ग्राहकले भोग्ने सास्ती र क्षतिको हिसाव हुनै सक्दैन । बैंकमा पैसा छ, आजको जमानामा त्यो पैसा निकाल्न भनेर चेक र एटीएम लिएर लाइनमा उभिनुपर्ने कुरा सुहाउँदो हुँदै भएन । 

अहिले त ग्राहकहरुले गुनासो गर्दा गर्दै थाँके भनेर सामाजिक सञ्जालमै बैंकलाई गाली गरिरहेका छन् । 

हुन त प्राविधिक रुपमा समस्या परेरै बैंकले यस्तो गरेको हो । तर, सिस्टम सुधारको काम थाल्नुअघि भैपरी आउने यस्ता समस्या समाधानको लागि पूर्वयोजना बनाएको भए सायद यस्तो हुँदैन थियो । किनकी एकैपटक कोर बैंकिङ सिस्टटमसँगै मोबइल बैंकिङ सिस्टम सुधार्न खोज्दा यो समस्या आएको बैंकले स्वीकारेको छ । 

हो, प्राविधिमा आउने समस्या कहिलेकाँही जटिल पनि हुन्छ, तर बैंकले यसबारे ग्राहकलाई खै त राम्रोसँग सुसूचित गरेको ? खै त प्रोपर इन्फरमेसन दिएको ? यो कार्यशैलीले त बैंकको युजर एक्सिपिरियन्स नराम्रोसँग बिग्रन्छ । 

बैंक भनेको विश्वास हो, त्यो विश्वास तोड्ने गरी कसैले काम गर्नुहुँदैन । बैंक व्यवस्थापन पनि पनि यसमा सम्वेदनशील हुनुपर्ने हो । नेपाल राष्ट्र बैंकले पनि यस्ता समस्याबारे चासो दिनुपर्ने हो । 

मोबाइल बैंकिङको समस्याबारे बुझ्न हामीले बैंकका सूचना अधिकारी सुनिल गोर्खालीलाई सम्पर्क गरको थियौं, उनको फोन अरु कसैले उठाएर भने, प्रोबलेम सल्भ हुन अझै एक दुई दिन लाग्छ । अझै पनि कहिले समस्या सुल्झिन्छ भन्ने कुरा बैंकलाई नै थाहा छैन । आशा गरौं, बैंकले छिट्टै आफ्नो सेवालाई नियमित गर्नेछ ।