एमाले फर्केपछि रामकुमारी : अवसर खोज्दै आएकी होइन

रामकुमारी झाँक्री ४ वर्ष तीन महिनापछि नेकपा एमालेमा फर्केकी छन् । उनीसहित एकीकृत समाजवादी पार्टीबाट आएकाहरुलाई अध्यक्ष केपी शर्मा ओलीसहितका नेताहरुले स्वागत गरे । 

त्यस क्रममा रामकुमारी झाँक्रीले विगतको आफ्नो भूमिका, एमालेप्रतिको धारणा र जेनजी आन्दोलनलगायतका विषयमा बोलेकी छन् । एमाले फर्किँदा रामकुमारीले के भनिन् त ? हामीले उनको भनाइ ५ बुँदामा समेटेका छौं :

कुनै शर्त राखेर फर्केको होइन

नेतृ झाँक्रीले आफू कुनै शर्त राखेर एमाले नफर्केको बताएकी छन् । उनले एमालेमा समाहित भएर सबै चुनौती सामना गरेर अगाडि बढ्ने बताएकी छन् । रामकुमारीले आफू कुनै अवसर खोज्दै नआएको पनि बताएकी छन् । 

ट्रोल हुन सक्छु, स्वीकार छ 

रामकुमारीले एमालेमा फर्किँदा आफ्ना विगतका भनाइहरुलाई लिएर आफूलाई ट्रोल गर्न सक्ने आँकलन गरेकी छन् । तर आफूलाई त्यो ट्रोल स्वीकार भएको बताएकी छन् । 

इतिहासमा आफ्नो तर्फबाट भएका कुराहरु आफूलाई ठीक लागेरै गरेको भन्दै उनले त्यसलाई प्रमाणित गर्ने वा आफूलाई सजाय तोक्ने जिम्मा समयलाई छाडिदिने बताएकी छन् । 

माधव नेपालहरुसँग गुनासो छैन 

रामकुमारीले एकीकृत समाजवादीमा गएकामा कुनै गुनासो नभएको पनि बताएकी छन् । तर त्यहाँबाट केही हुँदैन भन्ने निश्कर्षमा पुगेपछि आफू एमालेमा फर्केको उनको भनाइ छ । 

रामकुमारीले भनेकी छन्, ‘जोसँग यात्रा गरेँ, उहाँहरुप्रति गुनासो छैन, उहाँहरुप्रति सम्मान नै छ । तर त्यहाँबाट केही हुँदैन ।’ 

एमालेलाई अवसर छ 

रामकुमारीले जेनजी आन्दोलनपछि नेकपा एमालेलाई ठूलो अवसर आएको बताएकी छन् । 

व्यापारिक प्रतिष्ठान र व्यक्तिगत सम्पत्ति जलेकाहरुले नेकपा एमालेलाई खोजिरहेको उनको भनाइ छ । 

उनका अनुसार एमाले भर्सेज जेनजी आन्दोलनका स्टेक होल्डर र जेन्जी आन्दोलनका पीडितहरुको ध्रुवीकरण सुरु भएको पनि बताएकी छन् । 

जेनजीलाई आग्रह 

रामकुमारीले जेनजी पुस्तालाई आफ्नै पार्टी बनाउन आग्रह गरेकी छन् । यदि आफ्नै पार्टी बनाउने होइन भने एमालेमा आउन आग्रह गरेकी छन् । ‘एमालेमा आउनुस्, हर जेनजी साथीहरुका लागि एमाले प्रवेशका लागि चारै ढोका खुला छ ।’