पत्नीको उपचार खर्च नपाएको झलनाथको गुनासो

भदौ २४ गते विहानैदेखि राजनीतिक दलको कार्यालय र नेताहरुको घरमा तोडफोड सुरु भयो । 

डल्लुस्थित घरमा रहेका पूर्वप्रधानमन्त्री झलनाथ खनालले पनि एउटा समूह आफ्नो घरतिर आइरहेको सूचना पाए । तर उनले गम्भीर रुपमा लिएनन् । 

केहीबेरमा सुरक्षाकर्मीहरुले प्रदर्शनकारी आइसकेको भन्दै घरबाट निस्कन आग्रह गरे । यसो तल झरेका खनाललाई नेपाली सेनाको टोलीले तानेर लगिहाल्यो । 

घरमा भने तोडफोड भयो । आगजनी गरे । खनालका छोरा र श्रीमती घरमै थिए । छोरा निर्भिक कसोकसो बचे, तर खनालबी पत्नी रविलक्ष्मी चित्रकार बाहिर निस्किन पाइनन् । 

दिउँसो नेपाली सेनाको टोली अर्को घरबाट भर्‍याङ लगाएर खनालको घरमा पस्यो । बेहोस अवस्थामा भेटिएकी उनको शरीरको केही भाग समेत जलेको थियो । 

तत्काल कीर्तिपुर अस्पताल लगियो । उपचारका क्रममा उनको बायाँ हात समेत काटियो ।

त्यसपछि थप उपचारका लागि भारत लगिएको छ । उनको अहिले भारतकै एपोलो अस्पतालमा भइरहेको छ । 

रविलक्ष्मी प्राध्यापक समेत हुन् । उनले चार दशकभन्दा लामो समय अमृत साइन्स क्याम्पस (अस्कल) मा भौतिक शास्त्र पढाएकी थिइन् । आफ्नो प्राध्यापकको स्वास्थ्य अवस्थाबारे सरकारले सोधीखोजी समेत नगरेको खनालको गुनासो छ । 

‘सरकारले जेन–जी आन्दोलनका हत्या र घाइतेहरूको छानबिन, शहीद घोषणा र निःशुल्क उपचारको कुरा गर्‍यो । तर प्रधानमन्त्रीको घोषणामा रविलक्ष्मी चित्रकारलाई किन बिर्सियो ? प्रधानमन्त्रीलाई सोध्छु— उहाँ घाइते हुनुहुन्छ कि हुनुहुन्न ? उपचारको दायित्व सरकारको छ कि छैन ? आजसम्म एक शब्द सोधिएको छैन, कसैलाई पठाइएको छैन, खर्चबारे पनि चासो छैन’, उनले भने । 

एमालेको अध्यक्ष भइसकेका खनाल अहिले नेपाली कम्युनिस्ट पार्टीमा आवद्ध छन् । इलामका खनाल पटकपटक सांसद भए, २०६७ माघदेखि २०६८ भदौसम्म गरी ६ महिना प्रधानमन्त्री पनि थिए । तर खनालले पछिल्लो समय सार्वजनिक रुपमै आफ्नो आर्थिक अवस्था राम्रो नभएको बताउने गरेका छन् । २०७८ सालमा खनालले भारतमा मिर्गौला प्रत्यारोप गराएका थिए, त्यसबेला पनि सरकारले ८१ लाख रुपैयाँ उपचार खर्च व्यहोरेको थियो । 

खनालका अनुसार यो पटक रविलक्ष्मीलाई एयर एम्बुलेन्सबाट भारत लैजाने बेला समेत आर्थिक समस्या भएको थियो । कतैबाट सहयोग नपाएको त्यो बेला एमाले अध्यक्ष केपी शर्मा ओलीले साथीभाइलाई भनेर सहयोग गरेका थिए । 

खनालले इलाममा भएको पुख्र्यौली सम्पत्तिमध्ये ५५ रोपनी सरकारलाई दिएका थिए । त्यहाँ सीटीइभिटीको कार्यालय बनेको छ । डल्लुमा भएको घर, भदौ २४ मा जल्यो । 

श्रीमती एपोलोमा अस्पतालमा उपचाररत छन् । उपचारको दायित्व सरकारले नलिएको खनालको गुनासो छ । 

‘सयौं रोपनी जग्गा छैन, ७० रोपनी थियो– ५५ रोपनी सरकारलाई दिएँ । इलामको सिटीइभिटी हेर्नुस्, प्रधानमन्त्रीज्यु । यस्तो व्यक्तिको श्रीमती घाइते होइनन् र ? उपचार सरकारको दायित्व होइन र ?’ खनालले भने ।