'फुटबल व्यवस्थापनमा काम गर्छु, मसँग स्पष्ट प्लान छ'

नेपालमा २०८० जेठयता घरेलु फुटबलको मुख्य प्रतियोगिता शहीद स्मारक ए डिभिजन लिग हुन सकेको छैन । ए डिभिजनको मात्र होइन, सी डिभिजन छनोट, सी डिभिजन, बी डिभिजनका लिगहरु पनि हुन सकेका छैनन् ।

मोफसलका केही नकआउट फुटबल र स्थानीय प्रतियोगिता जस्तालाई छाड्ने हो भने नेपालमा फुटबल गतिविधि शून्यजस्तै छ । ए डिभिजन लिग नहुँदा खेलाडीहरुले नियमित अभ्यास गर्न र आफ्नो खेल क्षमता तिखार्न त पाएका छैनन् नै, उनीहरुको आर्थिक अवस्था पनि कमजोर भएको छ ।

नेपालबाट पछिल्लो समय खेलाडीहरु पलायन हुनुको कारण पनि नियमित फुटबल प्रतियोगिताहरु नहुनुलाई मानिएको छ । अखिल नेपाल फुटबल संघ (एन्फा) ले यस वर्ष पनि ए डिभिजन लिग नखेलाउने भनेपछि खेलाडीहरु सडक आन्दोलनमै उत्रिए । युवा तथा खेलकुद मन्त्रालयले पनि हस्तक्षेप गर्‍यो ।

त्यसपछि एन्फा नेतृत्व अबको चार महिनामा शहीद स्मारक ए डिभिजन लिग गर्ने भन्न बाध्य भयो । तर खेलाडीहरु अझै विश्वस्त छैनन् । नेपाल फुटबल खेलाडी संघका अध्यक्ष बिक्रम लामाले शहीद स्मारक ए डिभिजन लिग गर्न एन्फालाई दिएको दबाबमा खेलाडीहरुको नेतृत्व गरे । एन्फाले ४ महिनाभित्र लिग खेलाउने भने पनि अझै उनी ढुक्क देखिँदैनन् ।

नेपालमा फुटबल र फुटबल खेलाडीको अवस्था, एन्फाभित्रको बेथिती र फुटबलमा उनको योजनाबारे नेपाल शो का विनोद ढकालले लामासँग गरेको कुराकानी :

कुराकानीमा बिक्रम लामाले व्यक्त गरेको धारणाको सारसंक्षेप

एन्फाले ४ महिनाभित्र लिग खेलाउने प्रतिवद्धता गरेको छ । यसमा हामी आशावादी छौं । तर अहिले उसले अनुमानित मिति मात्र भनेको छ, अब हामी निश्चित मिति किटान गर्न दबाब दिनेछौं । 

घरेलु फुटबल नहुँदा एक हजार हाराहारी खेलाडी साढे २ वर्षदेखि बेरोजगार छन् । खेल्न नपाउँदा उनीहरुको आर्थिक अवस्थामा धेरै नै असर परेको छ । 

हामीले यसअघि ध्यानाकर्षण गराउने, ज्ञापन पत्र बुझाउने जस्ता काम गर्‍यौं, तर एन्फाले वास्ता गरेन । खेलाडीहरुको लागि खेलाडी आफैंले बोल्नुपर्छ भनेर हामी सडक आन्दोलनमै आएका हौं । 

एन्फाको व्यवस्थापनको कमजोरीका कारण फुटबल धेरै पछाडि पर्‍यो । एन्फा नेतृत्वको कुनै स्पष्ट योजना नै देखिएन । एन्फाले वार्षिक क्यालेन्डर बनाउने हो भने ऊ मातहतका सबै निकायले पालना गर्न बाध्य हुन्छन्, यसमा एन्फा नेतृत्वकै कमजोरी हो । 

नेपालबाट पछिल्लो समय फुटबल खेलाडी विदेशिने क्रम बढेको छ । खेलाडी विदेश जानुको अनेक कारण हुन सक्छन्, तर देशभित्र नियमित फुटबल गतिविधि भइरहेको भए यति धेरै संख्यामा खेलाडीहरु विदेश जानु पर्ने थिएन । 

म नेपाली फुटबलको व्यवस्थापनमा काम गर्न चाहन्छु, अझ मेरो चाहना एन्फाकै व्यवस्थापनमा काम गर्ने छ । 

नेपाली फुटबलमा गर्नुपर्ने कामका विषयमा मसँग स्पष्ट योजना छ । 

बिक्रम लामासँगको कुराकानी भिडियोमा हेर्नुहोस्