नेपालको सबैभन्दा बढी कर तिर्ने को-को ? 

नेपालको सबैभन्दा बढी कर तिर्ने मान्छे को होला ? जवाफ हो, राजबहादुर शाह ।उनी जाउलाखेल ग्रुप अफ इन्डस्ट्रिजका प्रबन्ध निर्देशक हुन् । 

जाउलाखेल डिस्ट्रिलरी चलाइरहेका शाहको कम्पनीले रुस्लान् भोड्का, कालापत्थर ह्विस्की, बर्डवाइजर बियर, ब्लु डायमण्ड जिनसहित दर्जनभन्दा बढी ब्राण्डका मदिरा उत्पादन गर्छ । 

आर्थिक वर्ष २०८१/८२मा शाहले नै सबैभन्दा बढी व्यक्तिगत आय कर तिरेका छन् । आन्तरिक राजस्व विभागले उनलाई आज सम्मान नै गरेको छ । 

यो त व्यक्तिगत रुपमै तिरिने आय करको कुरा भयो ।  नेपालमै सबैभन्दा धेरै आयकर कसले तिर्ला ? जवाफ हाे, नेपाल दूरसञ्चार प्राधिकरण ।

यो वर्ष नेपाल टेलिकमले मोबाइल सेवाको लाइसेन्स नवीकरणबापत २० अर्ब रकम तिरेकाले प्राधिकरणले सरकारलाई संस्थागततर्फ धेरै आयकर तिरेको हो । 

धेरै आयकर तिर्ने एकलौटी फर्म भने थर्ड आइ इन्टरनेसनल हो । 

वस्तुगत र निर्यात कारोबारतर्फ बढी आय कर डाबर नेपालले तिर्छ । डाबर नेपाल बहुर्राष्ट्रिय कम्पनी हो, जसले विभिन्न खाद्य र दैनिक उपभोग्य वस्तु उत्पादन गर्छ । डाबरले चेबनप्रास, हनी, दन्त मञ्जन र रियल जुस लायगतको उत्पादन गर्छ । 

सूचना–प्रविधि कम्पनीतर्फ बढी कर भेरिक्स नेपालले तिर्छ, यो विभिन्न सूचना प्रणाली र सफ्टवेयर बनाउने कम्पनी हो । 

कृषि/पशुजन्य उत्पादन गरेर बढी आयकर तिर्ने कम्पनी पोषक ब्रिडर हो । रुङ्गाटा ग्रुपले चलाएको यो उद्योगले पेलेट दाना उत्पादन गर्दै आएको छ । 

धेरै आय कर तिर्ने बैंक तथा वित्तीय संस्था नेपाल इन्भेष्टमेन्ट बैंक हो । पृथ्वीबहादुर पाँडे अध्यक्ष रहेको यो बैंकले गत वर्ष सबैभन्दा बढी कर तिर्‍यो । 

स्वास्थ्य/शिक्षातर्फ नोबेल मेडिकल कलेज छ । यो विराटनगरको मेडिकल कलेज हो । यसको सञ्चालक कांग्रेस नेता सुनिल शर्मा हुन् ।

टुरिजमतर्फ होटल सोल्टीले बढी आय कर तिर्छ । सोल्टीले काठमाडौंसहित चितवन, इटहरी, भैरहवा, नेपालगञ्ज, भक्तपुरमा होटलहरु चलाइरहेको छ ।  

वस्तु व्यापारतर्फ हुन होला ? शंका नै छैन, भाटभटेनी सुपरमार्केट । यो वर्ष त धेरै स्टोरहरु जल्दा भाटभटेनीलाई ठूलो धक्का लागेको छ, तर गत वर्ष यो कम्पनीले राम्रो व्यापार गरेर वस्तु व्यापारतर्फ सबैभन्दा बढी आय कर तिरेको थियो । 

मध्यस्तरीय करदातामा बढी कर तिर्ने सीडीएस एण्ड क्लियरिङ लिमिटेड हो । यो नेपाल स्टक एक्सचेन्जले प्रवर्द्धन गरेको कम्पनी हो, यसले क्लिेयरिङ सेटलमेन्ट सेवाहरु दिन्छ । 

ऊर्जातर्फ छ, भोटेकोशी पावर कम्पनी । यसले सिन्धुपाल्चोकमा ४५ मेगावाटको भोटेकोशी जलविद्युत आयोजना चलाइरहेको छ ।

रेमिट्यान्सतर्फ उही त हो, आईएमई । यो चन्द्र ढकालको रेमिट कम्पनी हो । 

५० करोडभन्दा बढी कारोबार गर्ने कम्पनीतर्फ भीएफ सर्भिसेजले बढी कर तिरेको छ । 

विशेष उद्योगतर्फ युनिलिभर नेपाल लिमिटेडले सबैभन्दा बढी आय कर तिरेको छ । युनिलिभर  विभिन्न दैनिक उपभोग्य वस्तु उत्पादन गर्ने बहुरािष्ट्रय कम्पनी हो । 

सबैभन्दा समयमै भ्याट तिर्ने कम्पनी चाहिँ कुन होला त ?  जवाफ हो, नेपाल टेलिकम ।