सुजन कडरियालाई अखिलको ढोका बन्द, दीपक धामी बने अध्यक्ष

नेकपा एमालेको विद्यार्थी संगठन अनेरास्ववियुले अध्यक्ष सुजन कडरियालाई पदमुक्त गरेको छ । र महासचिव दीपक धामीलाई अध्यक्ष तोकेको छ ।

भदौ २३ गते जेनजी आन्दोलनका क्रममा प्रहरीको गोली लागेर १९ जनाको मृत्यु भएपछि कडरियाले विद्यार्थी आन्दोलनकै कालो दिन भन्दै फेसबुकबाटै राजीनामा घोषणा गरेका थिए ।

पछि उनले आफूले दबाबमा परेर राजीनामा घोषणा गरेको भन्दै जिम्मेवारीमा फर्किन खोजेका थिए । तर पार्टी र संगठनलाई अप्ठेरो परेका बेला धोका दिएको भन्दै अनेरास्ववियु र एमालेभित्र उनी पदमा फर्किन नहुने मत पनि थियो ।

मंसिर १ गते बसेको अनेरास्ववियुको पदाधिकारी बैठकले अध्यक्ष कडरियालाई पदमुक्त गर्दै महासचिव दीपक धामीलाई अध्यक्ष तोकेको हो ।

त्यस्तै उपाध्यक्ष अञ्जना शिवाकोटीलाई महासचिवको जिम्मेवारी दिइएको छ । अनेरास्ववियुको पदाधिकारी बैठकको निर्णयलाई सचिवालय र केन्द्रीय समितिले पनि अनुमोदन गर्नुपर्नेछ ।

आफूलाई पदमुक्त गर्ने निर्णयलाई निवर्तमान अध्यक्ष कडरियाले स्वीकार गरेका छन् । उनले आफूले दिएको राजीनामा स्वीकृत गरिदिएको भन्दै धन्यवाद दिएका छन् र अध्यक्षको जिम्मेवारी पाएका दीपक धामीलाई बधाई दिएका छन् ।

उनले भनेका छन्, ‘भदौ २३ गतेको आन्दोलनमा प्रहरीको गोलीले विद्यार्थीको रगत बगेको क्षणसँगै मेरो अनेरास्ववियु यात्रा अन्त्य भएको सत्यलाई आजको गरिमामय बैठकले आधिकारिक मान्यता दिएकोमा म सम्मान व्यक्त गर्दछु ।’

हेर्नुहोस् भिडियो