आन्दोलन दमन गर्ने बाङ्लादेशकी प्रधानमन्त्रीलाई मृत्युदण्ड

बाङ्लादेशमा गत वर्ष भएको विद्यार्थी आन्दोलन दमन गरेको घटनामा प्रधानमन्त्री शेख हसिनालाई मृत्यु दण्डको सजाय सुनाइएको छ । 

बाङ्लादेशको इन्टरनेशनल क्राइम्स ट्रिब्युनलले गत वर्षको विद्यार्थी आन्दोलनमा करिब १४ सय जनाको मृत्यु हुनुमा प्रधानमन्त्री हसिनालाई मानवताविरुद्धको अपराधमा दोषी ठहर गरेको हो । 

आरक्षणको व्यवस्था खारेजीको माग गर्दै सुरु भएको आन्दोलनमा बाङ्लादेशमा चरम दमन भएको थियो । 

विद्यार्थी आन्दोलनले प्रधानमन्त्री कार्यालय नै घेरेपछि ५ अगस्ट २०२४ मा हसिना हेलिकप्टर चढेर विदेश भागेकी थिइन् । हाल उनी भारतमा निर्वासनमा छिन् । 

हसिनामाथि मानवताविरुद्धको अपराधसँगै ज्यानसम्बन्धी कसुर, ज्यान मार्ने उद्योग, घातक हतियार प्रयोगलगायतका ५ आरोपमा सुनुवाइ भएको थियो । 

हसिनाले भने आफूविरुद्धको सुनुवाइलाई राजनीति प्रेरित भनेकी छन् । 

अदालतले मंसिर १ गते हसिनासँगै उनका गृहमन्त्री असादुजमान खान कमल र प्रहरी प्रमुख चौधरी अबदुल्लाह अल मामुनलाई दोषी ठहर गरेको छ । 

अदालतको आदेश आएसँगै बाङ्लादेशको राजधानी ढाका र नजिकका क्षेत्रमा प्रदर्शन हुन सक्ने आशंकामा सरकारले सुरक्षा सतर्कता बढाएको छ । 

सरकारले शेख हसिनाको पार्टी अवामी लिगलाई पनि प्रतिबन्ध लगाएको छ ।