भदौ २४ गते जलेका काठमाडौंका ७३ प्रहरी कार्यालय मर्मत सम्भार

जेनजी आन्दोलनपछि गत भदौ २४ गते भौतिक संरचनाको ठूलो क्षति ब्यहोर्नेमा काठमाडौंका प्रहरी युनिटहरु पनि हुन् । भदौ २३ गते सरकारको चरम दमनका कारण १९ जनाको मृत्यु  भएको आक्रोश प्रहरी युनिटहरुमा पनि पोखिएको थियो । 

\जिल्ला प्रहरी परिसर काठमाडौं मातहत १२७ वटा प्रहरी युनिट रहेकामा भदौ २४ गते ९७ वटा प्रहरी कार्यालयमा क्षति भएको थियो । 

कतै घर पूर्ण रुपमा जलेका थिए भने कतै आंशिक मात्र जलेका थिए, कतै कागजपत्र जलाइनुका साथै केही कोठामा तोडफोड गरिएका थिए । आगजनी र तोडफोडका कारण धेरै प्रहरी युनिटहरु जाहेरी दरखास्त लिन, अभियुक्त पक्राउ गर्न पनि नसक्ने अवस्थामा पुगेका थिए । 

प्रहरी युनिटमा बस्ने कुर्ची टेबुल मात्र होइन, लेख्ने कागजसमेत थिएन । 

तर जेनजी आन्दोलननको साढे दुई महिना अवधिमा धेरै प्रहरी कार्यालयहरु पुरानै अवस्थामा फर्किसकेका छन् । ९७ वटा प्रहरी कार्यालयमा क्षति भएकामा ७३ वटा कार्यालय मर्मत सम्भार भइसकेका छन् । १७ वटा मर्मत सम्भारकै क्रममा छन् भने केही प्रहरी कार्यालय नयाँ बनाउनुपर्ने अवस्था छ । 

जिल्ला प्रहरी परिसर काठमाडौंका अनुसार जिल्लाका १५ वटा प्रहरी कार्यालयसँग अपराधका घटनामा जाहेरी लिने र अनुसन्धान गर्ने अख्तियारी छ । तीमध्ये १० वटा पूर्ण क्षमतामा सञ्चालन भइसकेका छन् । ५ वटा कार्यालय भने अहिले पनि आंशिक रुपमा मात्र अनुसन्धान गरिरहेका छन् । ती कार्यालयहरु हुन्, प्रहरी वृत्त बौद्ध, बानेश्वर, स्वयम्भू, गौशाला र जनसेवा । 

हाल ७ वटा प्रहरी युनिट, नजिकको अर्को ठाउँबाट सञ्चालन गरिएको छ भने ५ वटा कार्यालयलाई अर्को कार्यालयमा मर्ज गरिएको छ । 

जिल्ला प्रहरी परिसर काठमाडौंका प्रवक्ता एसपी पवन भट्टराईका अनुसार धेरै प्रहरी चौकीहरु पुनस्र्थापना हुनुमा स्थानीय समुदायको ठूलो भूमिका छ । स्थानीयले आफैंले मर्मत सम्भार गरेर प्रहरी चौकीहरु बस्नयोग्य बनाइदिएका थिए । स्थानीय निकाय र सर्वसाधारणले ४९ वटा दुई पांग्रे सवारी साधन प्रहरीलाई दिएका छन् । त्यस्तै २ वटा चारपांग्रे गाडी पनि दिएका छन् ।