एमाले एकै दिन सर्वोच्च र निर्वाचन आयोगमा

संसद बिघटनलाई असंवैधानिक भन्दै आएको नेकपा एमाले आज संसद पुनर्स्थापनाको माग लिएर सर्वोच्च अदालत पुगेको छ । 

बिघटित प्रतिनिधिसभाको एमाले संसदीय दलको तर्फबाट प्रमुख सचेतक महेश बर्तौला र सचेतक सुनीता बरालले संसद पुनस्र्थापनाको माग गर्दै रिट पेश गरेका हुन् । 
रिटमा उनीहरुले ७ वटा माग राखेका छन् । 

पहिलो हो, प्रधानमन्त्री सुशीला कार्की प्रतिनिधिसभाको सदस्य होइन, उनलाई संसदको कुनै पनि राजनीतिक दलको समर्थन छैन, त्यसैले उहाँको नियुक्ति असंवैधानिक छ, खारेज हुनुपर्छ ।

दोस्रो, सुशीला कार्कीलाई प्रधानमन्त्री नियुक्त गर्ने राष्ट्रप िरामचन्द्र पौडेलको भदौ २७ को निर्णय बदर गर्नुपर्छ । 

तेस्रो, सुशीला कार्की प्रधानमन्त्री नियुक्त भएपछि सरकारले गरेका निर्णय र नियुक्तिहरु बदर गर्नुपर्छ । 

चौथो, भदौ २४ गते पछिको समयलाई शून्य अवधि मानेर प्रतिनिधिसभा पुनर्स्थापना गर्नुपर्छ । 

पाँचौं, भदौ २४ गते कायम रहेका राज्यका सबै अंग, निकाय पूर्ववत अवस्थामा नै सञ्चालन रहने भनेर आदेश दिनुपर्छ । 

छैटौं, भदौ २४ गते केपी शर्मा ओलीले प्रधानमन्त्रीबाट राजीनामा दिएकाले संसदबाटै अर्को सरकार गठन प्रक्रिया सुरु गर्न राष्ट्रपतिको नाममा आदेश जारी गर्नुपर्छ । 

सातौं, पुनस्र्थापित प्रतिनिधिसभाको बैठक बोलाउन आवश्यक व्यवस्था मिलाउन सभामुख र संसद सचिवालयको नाममा आदेश जारी गर्नुपर्छ ।

संसद पुनर्स्थापनाको माग लिएर एमाले संसदीय दल  सर्वोच्च गएकै दिन एमालेको एक टोली भने चुनावका लागि दल दर्ता गर्न निर्वाचन आयोग पनि पुगेको छ ।