भाटभटेनीमा भेटिएका ७ अस्तुको पहिचान नेपालमा असम्भव !

चाबहिलको भाटभटेनी सुपरस्टोरमा भदौ २४ को आगजनीपछि ७ वटा अस्तु भेटिएको साढे दुई महिना भइसक्यो । 

तर ती शव कसको हो अहिलेसम्म खुलेको छैन । अब छिट्टै खुलिहाल्छ कि भन्ने अवस्था पनि छैन । प्रहरीले ती अस्तु पोस्टमार्टमका लागि त्रिवि शिक्षण अस्पतालमा पठायो । पूरा शरीर जलेर थोरै अंश मात्र बाँकी रहेकाले पोस्टमार्टम नै हुन सकेन । 

यता जिल्ला प्रहरी परिसर काठमाडौंमा आफ्ना आफन्त हराएको भनेर ७ जनाकै निवेदन पनि आइसकेको छ । हराएकाहरु सातै जना पुरुष छन् । 

तर प्रहरीले हराएका र जलेका मान्छे एउटै हुन् कि होइनन् पत्ता लगाउन सकेको छैन । 

पोटस्मार्टमबाट जलेकाहरुको पहिचान नभएपछि जिल्ला प्रहरी परिसरले ती अस्तुहरु डीएनए परीक्षणका लागि प्रहरीको केन्द्रीय विधिविज्ञान प्रयोगशालामा पठायो । तर विधिविज्ञान प्रयोगशालाले पनि उनीहरुको पहिचान गर्न सकिँदैन भनिसकेको छ । 

जिल्ला प्रहरी परिसर काठमाडौंका प्रवक्ता एसपी पवन भट्टराईका अनुसार शव पहिचानका लागि नेपालमा सम्भव छैन । विशेष प्रविधि भएको देशमा पठाउन सकिन्छ कि भन्ने पहल भइरहेको उनले बताएका छन् । उनी भन्छन्, ‘शव पहिचानका लागि तत्काल प्रहरीले केही गर्न सक्दैन ।’