विवेकशील साझा पार्टी रास्वपामा एकीकरण हुने

विवेकशील साझा पार्टी अब राष्ट्रिय स्वतन्त्र पार्टीमा एकीकरण हुने भएको छ ।

विवेकशील साझा पार्टीको मंसिर १० गते बसेको केन्द्रीय समिति बैठकले राष्ट्रिय स्वतन्त्र पार्टीसँग एकीकरण गर्ने निर्णय गरेको हो ।

पार्टीका उपाध्यक्ष प्रकाशचन्द्र परियारका अनुसार आगामी चुनावबाट पहिलो शक्ति  हुने लक्ष्यसहित रास्वपासँग एकीकरण गरिएको हो ।

पार्टी एकता घोषणा आउँदो आइतबार राष्ट्रिय सभागृहमा हुनेछ । एकीकरणका अन्य प्राविधिक सवालहरु दुवै दलका नेतृत्वबीचको उच्च समझदारीमा हुने भनिएको छ ।

पार्टीका प्रवक्ता आशुतोष प्रधानका अनुसार पार्टीका संस्थापक उज्वल थापाको योगदान र 'विवेकशील आन्दोलन'लाई लिपीवद्ध गर्ने र प्रतिनिधि सभा निर्वाचनलाई परिणाममुखी बनाउने सहमतिमा दुई दलबीद्ब एकीकरण भएको हो ।

२०६९ सालमा स्थापना भएको विवेकशील नेपाली दल सामाजिक आन्दोलनमा सक्रिय थियो । यो पार्टीका कार्यकर्ताहरु नेपाल बन्दको दिन नेपाल खुला छ भनेर प्लेकार्ड बोकेर सडक प्रदर्शन गर्थे । उसले अन्य सामाजिक मुद्दामा पनि रचनात्मक तरिकाले विरोध प्रदर्शन र सरकारलाई खबरदारी गर्थ्यो ।

२०७० सालको संविधानसभा चुनावमा यो पार्टीका धेरै नेताले काठमाडौंबाट उम्मेदवारी दिएका थिए । तर जित हासिल गर्न सकेनन् । २०७४ सालको स्थानीय तह चुनावमा विवेकशील पार्टीबाट रञ्जु दर्शनाले काठमाडौंको मेयरमा प्रतिस्पर्धा गरेर २३ हजार ४३९ मत ल्याएकी थिइन् ।

पछि यो पार्टी रवीन्द्र मिश्र नेतृत्वको साझा पार्टीसँग एकीकरण भएपछि विवेकशील साझा पार्टी बनेको थियो । तर दुई पार्टीबीच एकीकरण भएपछि विवाद बढ्दै गयो । पार्टी नै विभाजित हुन पुग्यो । पछि रवीन्द्र मिश्र पनि विवेकशील साझाको एउटा समूह लिएर राप्रपामा गए ।

अरु नेताहरु पनि अन्य पार्टीमा गएका र कतिपय निष्क्रिय बसेका कारण विवेकशील साझा पार्टी कमजोर हुँदै गएको थियो । यो पार्टीमा समीक्षा बाँस्कोटा अध्यक्ष र रञ्जु दर्शना महासचिव छन् ।

राष्ट्रिय स्वतन्त्र पार्टी भने २०७९ असारमा सञ्चारकर्मी रवि लामिछानेको सभापतित्वमा गठन भएको थियो । विवेकशील स्कुलिङबाट राजनीतिमा लागेकाहरु धेरै जना त्यतिबेला रास्वपामा गएका थिए ।

२०७९ मंसिरमा भएको प्रतिनिधिसभा चुनावमा यो पार्टीका २० सांसद चुनिए । पछि तनहुँमा भएको उपचुनावमा रास्वपाबाटै स्वर्णिम वाग्लेले जितेपछि २१ सांसद थिए ।