टाटा सियरा २०२५ कस्तो छ, कति पर्छ ?

भारतको टाटा मोटर्सले आफ्नो पुरानो आइकनिक ब्राण्ड सियरा भारतीय बजारमा फेरि ल्याएको छ । २५ नोभेम्बरमा उसले सियरा २०२५ सार्वजनिक गरेपछि यो गाडीप्रति चासो र चर्चा बढेको छ । 

सन् १९९१ मा पहिलो पटक उत्पादन भएको यो गाडी सन् २००३ देखि बन्द भएको थियो । 

कुनै समय यो गाडीले भारतीय बजारमा तहल्का नै पिटेको थियो । बलिउड फिल्महरुमा सुनिल सेट्टी, सनी देवल, अक्षयकुमारहरुले ठूलो पर्दामा यो गाडीलाई नियमित देखाइरहन्थे । 

सन् २००३ पछि भने सडकबाट यो गाडी विस्तारै हराउँदै गयो । टाटाले २२ वर्षपछि सियरा २०२५ नाममा यो गाडी पुन लञ्च गरेको छ । यो गाडीको मूल्य भारतीय बजारमा ११ लाख ४९ हजार रुपैयाँ रहेको छ ।

नयाँ पुस्ताको सियराको बुकिङ डिसेम्बर १६ बाट सुरु हुनेछ र डेलिभरी सन् २०२६ को मध्यबाट सुरु हुनेछ । 

टाटा सियरा २०२५ एसयूभी सेगमेन्टमा मिड साइजको गाडी हो । अहिले यो सेगमेन्टमा बजारमा चलेको ब्राण्ड भनेको हुन्डेको क्रेटा र कियाको सेल्टस हो । 

अहिले टाटाले सियराको इन्ट्री लेभलको भेरियन्टका लागि मूल्य सार्वजनिक गरेको हो । फुल प्राइस लिस्ट भने आगामी डिसेम्बरको सुरुमा ल्याउँदैछ । यसको टप मोडलको मूल्य २१ देखि २२ लाख रुपैयाँसम्म हुन सक्ने जनाइएको छ । 

अहिले बुकिङ खुला गरेको सियरा २०२५ को पेट्रोल र डिजेल गाडी हुन् । तर टाटा मोटर्सले यसको इलेक्टिक भर्सन पनि छिट्टै लन्च गर्ने बताइसकेको छ । 

सियरा २०२५ को इन्जिन शहरभित्र र हाइवे दुबै ठाउँमा चलाउन सकिने गरी बनाइएको छ । यसमा फाइभजी कनेक्टिभिटी पनि राखिएको छ । 

भारतीय बजारमा टाटा सियरा २०२५ भन्दा क्रेटा केही सस्तो छ । क्रेटाको मूल्य १० लाख ७३ हजार रुपैयाँ रहेको भने सियरा २०२५ को साढे ११  लाख । 

तर डिजाइन र फिचरमा भने टाटा सियरा २०२५ धेरै अलग र दमदार छ ।