उज्यालो नेपाल पार्टीले माग्यो उम्मेदवार

उज्यालो नेपाल पार्टीले फागुन २१ गते हुने चुनावमा यो पार्टीबाट उम्मेदवार बन्न चाहनेहरुसँग आवेदन माग गरेको छ । 

मंसिर १२ गते एक सूचना जारी गरेर उज्यालो नेपाल पार्टीले प्रत्यक्षतर्फको १६५ र समानुपातिकतर्फको ११० सिटमा उम्मेदवार बन्न आवेदन माग गरेको हो । 

प्रत्यक्षतर्फ उम्मेदवार बन्न चाहनेले आफ्नो निर्वाचन क्षेत्र तोकेर आवेदन दिनुपर्नेछ । प्रत्यक्षतर्फ सकेसम्म आफू मतदाता भएको निर्वाचन क्षेत्रकै उम्मेदवारमा आवेदन दिनुपर्नेछ । 

अनि समानुपातिक प्रणालीका लागि आवेदन दिन कुन क्लस्टरबाट उम्मेदवार बन्न चाहेको हो त्यो खुलाउनुपर्नेछ । 

उम्मेदवार हुन चाहनेले मंसिर २९ गतेसम्म आवेदन दिन सक्नेछन् । 

उज्यालो नेपाल पार्टीको अध्यक्षमा पूर्व ऊर्जा सचिव अनुप उपाध्याय छन् । यो पार्टीलाई हालका ऊर्जामन्त्री कुलमान घिसिङको पार्टी पनि भन्ने गरिन्छ । तर उनले आधिकारिक रुपमा बताइसकेका छैनन् । 

यो पार्टी निर्वाचन आयोगमा दर्ता भइसकेको छ भने घोषणासभा मंसिर १७ गते राखिएको छ ।