यसै वर्ष राष्ट्रिय लिग र ए डिभिजन लिग गर्ने एन्फाको निर्णय 

अखिल नेपाल फुटबल संघ (एन्फा) यसै वर्ष राष्ट्रिय लिग र ए डिभिजन लिग प्रतियोगिता गर्न तयार भएको छ ।

मंसिर १५ गते बसेको एन्फाको आपतकालीन बैठकले आउँदो पुस २५ गतेदेखि राष्ट्रिय लिग आयोजना गर्ने निर्णय गरेको छ । 

अनि राष्ट्रिय लिग सकिएको एक महिनापछि ए डिभिजन लिग सञ्चालन हुनेछ । 

राष्ट्रिय लिगमा यसअघिको ए डिभिजन लिगको सुपर सिक्समा रहेका ६ टिम र एन्फा प्रेसिडेन्ट लिगका उत्कृष्ट ४ टिम सहभागी हुने भनिएको थियो ।

तर एन्फाले राष्ट्रिय लिगमा ए डिभिजनका इच्छुक अरु टिमहरु पनि खेल्न पाउने निर्णय गरेको छ । 

एन्फाले क्लबहरुसँग राष्ट्रिय लिग गर्ने सहमति गरेपछि खेलाडीहरुले विरोध जनाएका थिए । उनीहरुले राष्ट्रिय लिगमा १० वटा मात्र टिम खेल्न पाउने हुँदा धेरै खेलाडी बेरोजगार हुने भन्दै विरोध गरेका थिए । 

कतिपय क्लबका पदाधिकारीहरुले पनि राष्ट्रिय लिगको सट्टा ए डिभिजन लिग नै खेलाउनुपर्ने बताएका थिए ।

अन्तिममा एन्फाले यसै वर्ष राष्ट्रिय लिग र ए डिभिजन लिग दुबै खेलाउने निर्णय गरेको महासचिव किरण राईले जानकारी दिए । 

नेपालमा २०८० जेठदेखि घरेलु फुटबल लिग हुन सकेको छैन । लामो समय लिग नहुँदा खेलाडीहरु बेरोजगार भएका छन् । 

एन्फाले आउँदो फागुनमा पोखरामा साफ महिला यु–१९ प्रतियोगिता आयोजना गर्ने निर्णय पनि गरेको छ ।