मिरजको नयाँ माग सर्वपक्षीय सरकार

जेनजी अभियन्ता मिरज ढुङ्गानाले फेरि अर्को माग राखेका छन्, सर्वपक्षीय सरकार गठन ।

प्रत्यक्ष निर्वाचित कार्यकारीको व्यवस्था नभएसम्म चुनावमा जान्नौं भन्दै आएका मिरजले आइतबार नयाँ माग अघि सारेका छन्– सर्वपक्षीय सरकार । 

आइतबार आयोजित पत्रकार सम्मेलनमा उनले भने, ‘अब सर्वपक्षीय सरकार गठन होस् । आजको आवश्यकता त्यस्तो राजनीतिक नेतृत्व हो, जसले सबै पक्षलाई विश्वासमा लिन सक्छ र देशलाई निकास दिन सक्छ ।’ 

मिरजले यो पनि भने कि, सुशीला कार्की नेतृत्वको सरकारले जेनजी आन्दोलनको मर्म बोक्न सकेन । 

गठन भएको १०० दिन पूरा भइसक्दा पनि सरकारले आन्दोलनको मागअनुसार काम गर्न नसकेको, समस्याको निकास दिन असफल भएको र समग्रमा सरकार नै असफल भएको उनको दाबी छ । 

आन्दोलनको म्यान्डेट चुनाव मात्र हो र ? भन्दै उनले जेनजीले आफ्नो माग पूरा गर्न दल खोलेर चुनावमा दुई तिहाइ बहुमत नै ल्याउनुपर्ने हो भन्ने प्रश्न गरे । 

मिरज नेतृत्वको संयुक्त जेनजी आन्दोलनाले सोमबारदेखि शान्तिपूर्ण आन्दोलन गर्ने घोषणा गरेको छ ।