विद्यार्थी नेता हत्यापछि बाङ्लादेश फेरि अशान्त

आन्दोलनकारी नेता शरीफ उस्मान हादीको हत्यापछि बाङ्लादेशमा फेरि प्रदर्शन चर्किएको छ । उनको हत्यामा संलग्नलाई पक्राउ गर्न इन्कलाब मञ्चले सरकारलाई २४ घण्टे अल्टिमेटम दिएको छ ।

बाङ्लादेशमा गत वर्ष भएको विद्यार्थी आन्दोलनका एक जना नेता उस्मान हादी हाल इन्कलाब मञ्च नामक नयाँ पार्टीको प्रवक्ता थिए । मञ्चले २४ घण्टाभित्र हादीको हत्यामा संलग्नलाई पक्राउ नगरे गृहमन्त्री र अन्तरिम सरकार प्रमुखका सहायक खुदा बख्श चौधरीले राजीनामा दिनुपर्ने माग गरेको छ । 

उस्मान हादीले बाङ्लादेशमा भारतको मुख्य आलोचकको छवि बनाएका थिए । आउँदो फेब्रुअरीमा हुने भनिएको चुनावमा उनले राजधानी ढाको क्षेत्र नम्बर ८ बाट उम्मेदवारी घोषणा गरेका थिए ।

डिसेम्बर १२ मा उनीमाथि गोली प्रहार भएको थियो । मोटरसाइकलमा आएका दुई जनाले उनको टाउकोमा गोली प्रहार गरेका थिए । गम्भीर घाइते भएका हादीको उपचारकै क्रममा गत बिहीबार सिंगापुरमा मृत्यु भएको थियो । 

हादीको हत्या पछि देशभर आक्रोश फैलिएको छ भने केही स्थानमा हिंसात्मक गतिविधिसमेत भएका छन् । यो घटनाले बंगलादेश–भारत सम्बन्धमा थप असर पर्ने देखिएको छ ।