काठमाडौंको १० क्षेत्रमा नेकपाबाट को को छन् उम्मेदवार ?

नेपाली कम्युनिस्ट पार्टी (नेकपा) ले काठमाडौंका १० वटै क्षेत्रको उम्मेदवार टुंगो लगाएको छ । केही पुरानै उम्मेदवार दोहोरिएका छन् भने धेरै नयाँ अनुहारलाई उम्मेदवार बनाएको छ ।

नेकपाले काठमाडौं १ मा मेनका भण्डारीलाई टिकट दिइएको छ । उनी एकीकृत समाजवादी एकताबाट आएकी युवा नेता हुन् । 

काठमाडौं २ मा नितेश पौडेल उम्मेदवार छन् । उनी नेकपाका सहसंयोजक माधवकुमार नेपालका भान्जा समेत हुन् । उनी पनि एकीकृत समाजवादीबाट आएका हुन् ।

काठमाडौं ३ मा निरज लामा, काठमाडौं ४ मा इन्द्र भुसाल र काठमाडौं ५ मा कल्पना शर्माले टिकट पाएका छन् । 

काठमाडौं ६ मा हेमलाल शर्मा उम्मेदवार छन् । हिमाल शर्मा नामले चिनिने उनी यसअघि यही क्षेत्रमा माओवादी केन्द्रका उम्मेदवार थिए । 

काठमाडौं ७ मा बसन्त मानन्धर र काठमाडौंमा ७ मा सुमन सायमी उम्मेदवार बनेका छन् । मानन्धर बाग्मती प्रदेश सभा सदस्य हुन् । प्रदेशसभा सदस्य पदबाट राजीनामा दिएर सांसदको चुनाव लड्न लागेका हुन् । 

काठमाडौं ८ को टिकट पाएका सायमी, हालै मात्र नेकपा प्रवेश गरेका थिए । अघिल्लो पटक लौरो चुनाव चिह्न लिएर उम्मेदवारी दिएका उनी राजेन्द्र महतो नेतृत्वको राष्ट्रिय मुक्ति पार्टीमा थिए । तर चुनावको मुखमा नेकपा प्रवेश गरेर टिकट लिएका हुन् । 

नेकपाले काठमाडौं ९ मा राधाकृष्ण महर्जन र १० मा हितमान शाक्यलाई उम्मेदवार बनाएको छ । शाक्य २०७४ को चुनावमा पनि काठमाडौं १० मा उम्मेदवार बनेका थिए, तर पराजित भएका थिए ।