जाँचबुझ आयोगको म्याद फेरि थपियो

भदौ २३ र २४ गतेको घटनाका दोषी को हुन् ? 

भदौ २३ गते कसरी गोली चल्यो, कसरी त्यति धेरै मान्छेको हत्या भयो ? 

अनि भदौ २४ गते संसद, सिंहदरबार र सर्वोच्च अदालत जलाउने को थिए ? पार्टी कार्यालय, व्यापारिक प्रतिष्ठान र नेताका घरहरु जलाउने को थिए ? 

यो सबै छानबिन गर्न गठित जाँचबुझ आयोगले अझै काम सकेको छैन । गत असोज ५ गते सरकारले पूर्वन्यायाधीश गौरीबहादुर कार्कीको नेतृत्वमा आयोग गठन गरेको थियो । 

त्यो आयोगलाई सुरुमा ३ महिना समय दिइएको थियो । ३ महिनामा काम नसकिएपछि सरकारले १ महिना समय थप गरेको थियो । 

तर थपिएको एक महिना समय पनि सकियो, आयोगले प्रतिवेदन तयार पारेको छैन । 

माघ ८ गते बसेको मन्त्रिपरिषद बैठकले आयोगको म्याद फेरि एक महिना थप गरिदिएको छ । गृह मन्त्री ओमप्रकाश अर्यालका अनुसार आयोगले प्रतिवेदन लेख्ने काम केही बाँकी छ भनेकाले म्याद थप गरिएको हो । 

सुरुमा आयोगको कामलाई लिएर केही विवाद देखिएको थियो । अध्यक्ष गौरीबहादुर कार्कीले तत्कालीन सरकारका नेताहरुलाई पक्राउ गर्नुपर्छ भनेर दिएको अभिव्यक्तिलाई लिएर एमालेका अध्यक्ष केपी शर्मा ओलीले आपत्ति जनाएका थिए । उनले आयोग पूर्वाग्रही भएको भन्दै बयान नदिने बताएका थिए । 

आयोगले बयान लिनुअघि ओली, लेखकलगायतलाई उपत्यका छाड्न नपाउने गरी स्थानहद गरेको थियो । सबैको बयान सकेर स्थान हद पनि खुलिसकेको छ । आयोग अहिले प्रतिवेदन लेख्नमा जुटेको छ ।