स्वागत नेपाललाई साइबर ब्यूरोले किन बोलायो ?

उनी कहिले सेनाले स्थिति नियन्त्रणमा लिएर सरकार बनाउनुपर्छ भन्छन्, कहिले यो चुनावमा धेरै बुथहरु जल्ने धम्की दिन्छन् । 

अनि कहिले सरकारले आफू सुंरक्षित उम्मेदवारका लागि हतियार पड्काउँछ भनेर आरोपित गर्छन् । 

तिनै व्यक्ति अहिले राष्ट्रिय प्रजातन्त्र पार्टीमा प्रवेश गरेर आफैं उम्मेदवार बनेका छन् । 

झापा–२ बाट राप्रपा उम्मेदवार बनेका स्वागत नेपाललाई उनका विगतका अभिव्यक्ति र फेसबुक स्टाटसका कारण प्रहरीले बयानमा बोलाएको छ । 

नेपाल प्रहरीको साइबर ब्यूरोले माघ ७ गते फोन गरेर उनलाई बयान दिन आउनू भनेको छ । ब्यूरोका प्रवक्ता दीपकराज जोशी भन्छन्, ‘उहाँलाई फोन गरेर बोलाएको हो, आउँछु पनि भन्नुभएको छ ।’

उनको कुन भनाइका कारण बयानमा बोलाइएको हो भन्ने प्रहरीले खुलाएको छैन । तर सामाजिक सञ्जालमा आएका उनका अभिव्यक्तिकै विषयमा सोधपुछ गर्न बोलाइएको हो । 

स्वागत नेपाललाई प्रहरीले बयानमा बोलाएको घटनालाई उनको दल राप्रपाले भने विरोध जनाएको छ । राप्रपाले विरोध मात्र जनाएको छैन, यो घटनालाई राजनीतिकरण गर्ने प्रयास पनि गरेको छ । 

पार्टी प्रवक्ता मोहनकुमार श्रेष्ठले राप्रपाले देशैभरि उम्मेदवारी दिएर मुख्य प्रतिस्पर्धामा देखिएपछि सरकारले राप्रपाका उम्मेदवारविरुद्ध अनावश्यक र पुराना विषय उठाएर आक्रमण गरेको आरोप लगाएका छन् । 

उनले स्वागत नेपाललाई बयानका लागि बोलाएर उनको चुनावी गति अवरुद्ध गर्न खोजेको भन्दै आपत्ति जनाएका छन् ।