बालेनतिर गएको २४ घण्टा नबित्दै एमालेमै फिर्ता 

बालेनलाई जिताउने भन्दै एमाले छाडेर रास्वपा गएका कमल गैरे २४ घण्टा नबित्दै फेरि एमालेमा फर्किएका छन् ।

केपी ओलीको गृहनगर दमक नगरपालिकाको युवा संघका सचिव नै बालेनलाई समर्थन गर्न गए भनेर खबर फैलिएको थियो । गैरे आफैंले फेसबुकमा एमालेको साधारण सदस्यसमेत नरहने गरी छाडेको जानकारी गराएका थिए । 

तर आज भने उनले अध्यक्ष केपी शर्मा ओलीसँगको तस्वीर सार्वजनिक गर्दै फेरि एमालेमा नै फर्किएको बताएका छन् ।

हिजो केही व्यक्तिको दबाब र प्रभावमा परेर एमाले छाडेको उनको स्पष्टीकरण छ । झापा–५ मा एमाले अध्यक्ष ओलीसँग चुनाव लड्न यसपालि काठमाडौंका मेयर  छाडेर बालेन शाह पुगेका छन् । 

बालेन झापा आएपछि चुनावी परिणाम के हुन्छ भनेृर चासो बढिरहेका बेला गैरेले पार्टी छाडेको खबरले धेरैलाई तरंगित बनाएको थियो ।

तर उनको घोषणा एक दिन पनि टिकेन । उनले पार्टी छाड्नु गल्ती भएको भन्दै पुनः एमालेमै फर्केको भन्दै ओलीलाई जिताउने अभियानमा लाग्ने उल्लेख गरेका छन् ।