रुकुममा प्रचण्डसँग चुनाव लडेका शहीदपुत्र

माओवादी सशस्त्र युद्धको उद्गम भूमि रुकुम पूर्वबाट चुनाव उठेका नेपाली कम्युनिस्ट पार्टीका अध्यक्ष पुष्पकमल दाहाल प्रचण्डको जितमा धेरै ठूलो आशंका छैन । 

तर यसपटक उनका प्रतिस्पर्धीका रुपमा आएका छन्, माओवादी सशस्त्र युद्धकै शहीद पुत्र, २८ वर्षका सन्दीप पुन । 

सन्दीपका बाबु सूर्यप्रकाश पुन र आमा परम्परा गौतमको माओवादी सशस्त्र युद्धकै क्रममा मृत्यु भएको थियो । २०६२ साल जेठमा बझाङमा भएको सैन्य कारबाहीमा उनीहरुले ११ दिनको फरकमा ज्यान गुमाएका थिए । 

त्यसपछि आफन्तको आश्रयमा हुर्किएका सन्दीपले शहीद तथा बेपत्ता परिवार फाउन्डेसनमा पनि काम गरे । उनले पूर्वाञ्चल विश्वविद्यालयबाट बी टेकको अध्ययन पूरा गरेका छन् । 

सन्दीप प्रगतिशील लोकतान्त्रिक पार्टीबाट उम्मेदवार बनेका छन् । प्रगतिशील लोकतान्त्रिक पार्टी भनेको माओवादी छाडेका डा. बाबुराम भट्टराई र जनार्दन शर्माको पनि पार्टी हो । रुकुम जनार्दन शर्माको प्रभाव क्षेत्र हो । उनले २०६४ देखिका सबै चुनाव जितेका छन् । 

माओवादी केन्द्र, एकीकृत समाजवादीसहितका दलहरुबीच एकता हुँदा जनार्दन शर्मा भने पार्टीबाट अलग्गिए । उनले बाबुराम भट्टराई नेतृत्वको नेपाल समाजवादी पार्टीसँग एकीकरण गरेर प्रगतिशील लोकतान्त्रिक पार्टी बनाए । 

रुकुम पश्चिमबाट जनार्दन आफैं उम्मेदवार बनेका छन् भने रुकुम पूर्वमा सन्दीप पुन उम्मेदवार छन् । रुकुम पश्चिममा प्रगतिशील लोकतान्त्रिक पार्टी र नेकपा एमालेबीच चुनावी तालमेल भएको छ । एमालेका उम्मेदवार लिलामणि गौतमको उम्मेदवारी कायम रहने छैन, एमालेले आफ्नो मत अब प्रलोपाका सन्दीपलाई दिनेछ । 

प्रलोपा उम्मेदवार पुनका अनुसार विप्लव नेतृत्वको नेकपा माओवादीसँग पनि तालमेलको विषयमा छलफल भइरहेको छ । 

रुकुम पूर्वमा ११ जना उम्मेदवार छन् । नेपाली कांग्रेसबाट कुसुमदेवी थापा,राष्ट्रिय स्वतन्त्र पार्टीबाट लखनकुमार थापा, राष्ट्रिय जनमोर्चाबाट चन्द्रप्रसाद शाही, नेकपा माओवादीबाट जुद्धबहादुर बुढामगर, मंगोल नेशनल अर्गनाइजेसनबाट ज्योति रोकामगर, नेशनल रिपब्लिक नेपालबाट धर्मकुमार बुढा उम्मेदवार छन् । 

रुकुम पूर्वमा ३४ हजार ७७२ मतदाता रहेका छन् । यो भनेको २०७९ सालको चुनावमा भन्दा करिब १२ सय बढेको हो । 

२०७९ को चुनावमा माओवादी केन्द्र र नेपाली कांग्रेसले गठबन्धन गरेर चुनाव लडेका थिए । गठबन्धनका उम्मेदवार माओवादी केन्द्रका पूर्णबहादुर घर्ती १२ हजार २६२ मत ल्याएर निर्वाचित भएका थिए । नेकपा एमालेका कैलाशकुमार मल्ल ५ हजार २६२ मत ल्याएर दोस्रो भएका थिए । 

समानुपातिकतर्फ माओवादी केन्द्रले ८ हजार २७१ मत ल्याएको थियो । 

नेपाली कांग्रेसले ५ हजार ६९२, नेकपा एमालेले ३ हजार ६५९ र राष्ट्रिय स्वतन्त्र पार्टीले ४६६ मत ल्याएको थियो ।