रास्वपाले बहुमत ल्याउँछ, मुख्य प्रतिस्पर्धी एमाले

भदौ २३ र २४ को जेनजी जनआन्दोलन नभएको भए नेपालमा २०८४ सालमा मात्र चुनाव हुने थियो । तर जेनजी विद्रोहले नेपालको सत्ता र संसदलाई स्वीकार गरेन, ताजा जनादेश लिन फागुन २१ गते चुनाव हुँदैछ ।

यो चुनावमा परम्परागत राजनीतिक शक्तिसँगै नयाँ शक्तिको रुपमा राष्ट्रिय स्वतन्त्र पार्टी देखिएको छ । २०७९ सालको चुनावमा शहरी क्षेत्रबाट राम्रो जनमत बटुलेको यो पार्टी अहिले गाउँसम्म फैलिएको छ ।

अर्कोतर्फ जेनजी बिद्रोहले उठाएको भ्रष्टाचार अन्त्य र सुशासनको मागले लामो समय सत्तामा बसेका कांग्रेस, एमाले, माओवादी लगायतका दललाई रक्षात्मक अवस्थामा पुर्‍याएको छ । यो अवस्थामा चुनावी प्रतिस्पर्धा कस्तो हुन्छ ? यही विषयमा समाजशास्त्री राम गुरुङसँग गरिएको कुराकानीको सारसंक्षेप : 

• यसपटक धेरै मतदाता नयाँ पार्टीलाई मत दिने तयारीमा रहेको देख्छु । त्यसले गर्दा राष्ट्रिय स्वतन्त्र पार्टी अघिल्लो चुनावमा भन्दा धेरै नै ठूलो साइजमा आउन सक्छ । एक्लै सरकार चलाउन सक्ने गरी बहुमत ल्याउने देख्छु । 

• बालेन शाहलाई भित्र्याउने रास्वपाको रणनीतिले माहोल ल्याएको छ । रास्वपालाई युवा पुस्तामाझ लोकप्रिय बनाउने काम बालेन शाहले गरेका छन् । 

• रास्वपाले उम्मेदवारी छनोटमा जति ध्यान दिनुपर्थ्यो, जस्ता मान्छेलाई उम्मेदवारको रुपमा अगाडि सार्नुपर्थ्यो, त्यो गरेको देखिएन । 

• नेपाली कांग्रेसमा गगन थापाहरुले गरेको हस्तक्षेपले यो चुनावमा धेरै काम गर्ने देखिँदैन । किनकी गगन थापा कांग्रेसभित्र लोकप्रिय हुन्, बालेनजस्तो आम युवामाझ लोकप्रिय होइनन् । 

• यो चुनावमा रास्वपाको प्रतिस्पर्धा एमालेसँग हुने देखिन्छ । किनकी रास्वपामा जाने नेताहरु धेरैजसो कांग्रेस पृष्ठभूमिका छन्, त्यसैले उसको मत घट्न सक्छ, एमालेको धेरै मत जोगिने देख्छु । 

• रास्वपाले बहुमत ल्याएर सरकार चलाउने अवस्थामा ऊसँग पुराना दलहरुसँग जस्तो अनुभव र योग्य मान्छेहरु नहुँदा समस्या पर्न सक्छ । तर नागरिकसँग चुनावपछिको अवस्था स्वीकार्नुको विकल्प हुन्न । 

पूरा भिडियो हेर्नुहोस् :