निपा भाइरस कसरी सर्छ ? कसरी बच्ने ?

भारतको पश्चिम बंगालमा निपा भाइरस देखिएपछि नेपालमा पनि यो भाइरसबारे चासो बढेको छ । 

स्वास्थ्य मन्त्रालयले देशैभरका स्वास्थ्य संस्थालाई निपा भाइरसको संक्रमण नेपालमा पनि हुन सक्ने भन्दै तयारी अवस्थामा रहन भनेको छ । 

के हो त निपा भाइरस ? यसले मानिसलाई कस्तो असर पार्छ ? यसबाट बच्न के गर्ने ? आज हामी यही निपा भाइरसबारे जानकारी गराउनेछौं । 

निपा भाइरस पशुबाट मानिसमा सर्ने रोग हो । यो भाइरस खासगरी फ्रुटब्याट भनिने एक प्रकारको चमेरोमा पाइन्छ । 

सबैभन्दा पहिला निपा भाइरस सन् १९९८ मा मलेसियामा बंगुर पालन गर्ने किसानमा देखिएको थियो । 

निपा भाइरसको प्रकोपका कारण तीन सय जनाले ज्यान गुमाएका थिए । प्रकोप नियन्त्रण गर्न १० लाख भन्दा धेरै बंगुर मारिएको थियो । त्यो बेला यो भाइरस बाङ्लादेश, भारत, फिलिपिन्स र सिंगापुरमा पनि फैलिएको थियो । 

विज्ञहरुका अनुसार भाइरस संक्रमण भएको चमेरो वा सुँगुरजस्ता जनावरको सम्पर्कमा पुग्दा निपा भाइरस सर्छ । भाइरस रहेको फलफूल खाँदा पनि निपा भाइरसको संक्रमण हुन्छ । मान्छेबाट मान्छेमा निपा भाइरस सर्नु चाहिँ दुर्लभ मानिन्छ । 

निपा भाइरस संक्रमण भएको चाहिँ कसरी थाहा पाउने ? 

निपा भाइरस संक्रमण भएमा ज्वरो आउने, टाउको दुख्ने, जिउ दुख्ने, चक्कर लाग्ने, खोकी लाग्ने, सास फेर्न गाह्रो हुने जस्ता लक्षण देखिन्छ । 

गम्भीर अवस्थामा बिरामीको होस हराउने वा अचेत हुने पनि हुन सक्छ । 

विश्व स्वास्थ्य संगठनले निपा भाइरसको संक्रमणलाई घातक रोगको सूचीमा राखेको छ, यसको संक्रमितको मृत्युदर ४० देखि ७५ प्रतिशतसम्म छ । 
हालसम्म नेपालमा निपा भाइरसको संक्रमण पुष्टि भएको छैन । तर संक्रमण हुन सक्ने सम्भावना देखेर तयारी अवस्थामा रहेको स्वास्थ्य मन्त्रालयको भनाइ छ ।