जेनजी शहीदकी आमा सुदनलाई भेट्दा भावुक

राष्ट्रिय स्वतन्त्र पार्टीका सांसदहरुको तालिममा आज एक जना महिला सांसदले सुदन गुरुङलाई अंगालो हालेर भक्कानिएको देख्नुभयो ?

रास्वपा सांसदहरुका लागि ललितपुर ग्वार्कोको होटल रोयल टुलिपमा अभिमुखीकरण तथा परिचयात्मक कार्यक्रम थियो । 

जेनजी आन्दोलनका शहीद रसिक खतिवडाकी आमा रचना खतिवडालाई रास्वपाले समानुपातिक प्रणालीबाट सांसद बनाएको छ । अनि जेनजी आन्दोलनबाटै चिनिएका सुदन गुरुङ पनि गोरखा १ बाट चुनाव जितेका छन् । 

कार्यक्रम सुरु हुनै लागेको थियो । रचना एउटा टेबुलमा बसेकी थिइन् । सुदन सहभागीहरुसँग कुरा गर्दै गर्दै रचना बसेको टेबुलमा पुगे । सुरुमा उनीहरु आपसमा परिचित जस्तो गरेर हाँस्दे अंकमाल गरे । तर एकैछिनमा रचना भावुक बनिन्, आँखाभरि आँशु बनाइन् । रचनाले सुदनलाई धेरैबेर अंगालोमा बाँधिरहिन् । सुदनले उनको आशु पुछिदिए । 

रचनाका छोरा २२ वर्षका रसिक खतिवडाको भदौ २३ गते जेनजी आन्दोलनमा प्रहरीको गोली लागेर मृत्यु भएको थियो । रचनाले सुदनलाई देखेपछि आफ्नो छोरा सम्झिएको हुन सक्छ । त्यसैले उनले आँशु थाम्न सकिनन् । अहिले यो फोटो र भिडियो सामाजिक सञ्जालमा खुबै फैलिएको छ ।