पोखरा विमानस्थलमा पूर्वअर्थमन्त्री कार्कीविरुद्ध भ्रष्टाचार मुद्दा

पोखरा क्षेत्रीय अन्तर्राष्ट्रिय विमानस्थल निर्माणको क्रममा ठेकेदारलाई कर छुट दिएर अनियमितता गरेको आरोपमा तत्कालिन अर्थमन्त्री ज्ञानेन्द्रबहादुर कार्कीसहित १३ जना व्यक्ति र एक कम्पनीविरुद्ध भ्रष्टाचार मुद्दा दायर भएको छ । 

पोखरा अन्तर्राष्ट्रिय विमानस्थल निर्माणको जिम्मा पाएको चिनियाँ ठेकेदार कम्पनी चाइना सीएएमसी इन्जिनियरिङ कम्पनीलाई आपसी मिलेमतो, योजना र संलग्नतामा ३ अर्ब ६२ करोड रुपैयाँ कर छुट दिएको अख्तियार दुरुपयोग अनुसन्धान आयोगले जनाएको छ । 

नेपाल नागरिक उड्डयन प्राधिकरण र ठेकेदार कम्पनीबीच विमानस्थल निर्माणको मूल सम्झौता हुँदा खरिद मूल्यभित्रै कर, महसुल तथा अन्य शुल्कहरु ठेकेदार कम्पनीले तिर्ने भनिएको थियो । 

तर बदनियत राखेर उक्त प्रावधान विपरीत ठेकेदार कम्पनीलाई कर, महसुल तथा अन्य शुल्कहरु छुट दिने भन्ने शर्त राखी कार्यान्वयन एग्रिमेन्ट गरे गराएको आरोपमा कार्कीसहितका पदाधिकारी र ठेकेदार कम्पनीविरुद्ध मुद्दा दायर गरेको हो । 

नेपाली कांग्रेसका नेतासमेत रहेका कार्कीलाई पूर्व अर्थमन्त्रीको हैसियतमा गरेको कामको आधारमा भ्रष्टाचार मुद्दा लागेको हो । त्यस्तै तत्कालिन अर्थ सचिव शंकरप्रसाद अधिकारी, पर्यटन मन्त्रालयका सचिव महेश्वर न्यौपाने, अर्थ मन्त्रालयका तत्कालिन सहसचिव केवलप्रसाद भण्डारी, पर्यटन मन्त्रालयका सहसचिव सुरेश आचार्य, डण्डुराज घिमिरे र नागरिक उड्डयन प्राधिकरणका तत्कालिन महानिर्देशक सञ्जीव गौतमविरुद्ध पनि भ्रष्टाचार मुद्दा दायर भएको छ । 

भ्रष्टाचार मुद्दा लाग्ने अन्य अधिकारीहरुमा नागरिक उड्डयन प्राधिकरणका तत्कालिन निर्देशक प्रदीप अधिकारी, पर्यटन मन्त्रालयका इलेक्ट्रोनिक्स इन्जिनियर योगेश अर्याल, अर्थ मन्त्रालयका उपसचिव युगराज पाण्डे र शाखा अधिकृत उर्मिला भण्डारी पनि छन् । 

त्यस्तै ठेकेदार कम्पनी चाइना सीएएमसी इन्जिनियरिङ र त्यसका अध्यक्ष वाङबो र प्रोजेक्ट म्यानेजर याङ झिग्याङ रहेका अख्तियारका सहायक  प्रवक्ता गणेशबहादुर अधिकारीले जानकारी दिएका छन् ।