‘छाती त थापेकै छु, तर काठमाडौंको केस फरक हो’

राष्ट्रिय स्वतन्त्र पार्टीका सभापति रवि लामिछानेले भूमिहीनहरुको बस्तीमा डोजर चलाए आफूले छाती थाप्छु भनेका विषयमा स्पष्टीकरण दिएका छन् । 

आइतबार रास्वपा सांसदहरुको प्रशिक्षण कार्यक्रममा उनले भूमिहीनको बस्तीमा डोजर चलाएमा अहिले पनि छाती थाप्ने बताए । तर काठमाडौंको घटना भने अलग भएको उनले जिकिर गरे । 

काठमाडौंमा गैरकानुनी रुपमा जग्गा हडपिएको, खोला छेउमा असुरक्षित तरिकाले बसोबास गरिएको र वर्षौंदेखि पेन्डिङमा रहेकाले डोजर चलेको लामिछानेले बताए । 

तर अन्य ठाउँमा यस्तो समस्या नभएको उनको भनाइ छ । 

काठमाडौंमा पनि भूमिहीनहरुको बस्ती खाली गराउँदा यो भन्दा राम्रो तरिका अपनाउन सकिने भन्दै उनले यसलाई सुधार गर्नुपर्ने बताए । 

सुकुम्बासी बस्तीमा डोजर चलाएकोबारे रविको भनाइको सम्पादित अंश : 

सुकुम्बासी समस्याको विषयमा हामीलाई गाह्रो भयो, हामीलाई (मतदाताले) यसो भनिरहनुभएको छ भन्नुहोला, गाह्रो मान्नै पर्दैन ।  

यो समस्या रास्वपाले खडा गरेको हो र ? हाम्रो कारणले एउटा घर सुकुम्बासी बनेको छ ? हाम्रो कारणले खडा भएको एउटा पनि होइन, हामी त समाधान गर्दैछौं । 

यो त पुराना राजनीतिक दलले भोट बैंकका रुपमा खडा गरेर उनीहरुको समस्यालाई आफ्नो लाभका लागि प्रयोग गरेको भन्ने कुरा त जगजाहेर छ नि ।  हामी त्यसलाई समाधान गर्न चाहन्छौं । समाधान गर्ने क्रममा अझ राम्रो तरिकाले समाधान गर्न सकिन्थ्यो कि, सकिन्थ्यो होला, गरौंला पनि । 

तर फेरि पनि दोहोर्‍याउँछु, तपाईंहरु निर्धक्कका साथ के भन्न सक्नुहुन्छ भने अव्यवस्थित रुपमा खोलाको छेउमा असुरक्षित ढंगले बस्नुभएका, हाकाहाकी,  देखादेखी, सोझै, गैरकानुनी ढंगले हडपिएको अवस्थामा कदम चालिएको हो । 

त्यसभन्दा बाहेक कसैले पनि आत्तिनु पर्दैन । त्यसका लागि छाती थाप्छु भनेको हो, छाती त थापिएकै छ नि अहिले पनि, सबैलाई लालपूर्जा दिन्छौं ।

समस्या त ३० वर्षदेखि उहाँहरुले खडा गर्नुभयो, छाती हाम्रो थापिएको छ, छाती अहिले पनि थापिरहेका छौं, छाती हटाउँदैनौं, तबसम्म हटाउँदैनौं जबसम्म भूमिहीनले आफ्नो अधिकार पाउँदैनन् । 

हामी व्यवहारिक रुपमा यो समस्यालाई स्थायी रुपमा समाधान गर्छौं । खोला छेउमा अव्यवस्थित रुपमा रहेकाहरुका लागि सरकारले चालेको कदम, लामो समयदेखि पेन्डिङमा रहेको काठमाडौको हकमा भएको विषयलाई लिएर कसैले पनि राजनीतिक रुपमा भूमिहीन साथीहरुलाई उचाल्नुपर्दैन । तपाईहरु उचाल्दै गर्नुस् हामी दिन्छौं लालपूर्जा । 

कतिपय साथीहरुले अहो सभापतिज्यू हाम्रोमा भूमिहीनहरुले अप्ठेरो पार्ने भए, हामीलाई भोटै दिँदैनन् कि क्या हो भन्नुहुन्छ ।  

चुनावको बेलामा पनि भनेको छु म झु्टा वाचा गरेर चुनाव जित्नु भन्दा हार्न तयार छु । म झुटो वाचा गर्नेवाला छैन । यसलाई शक्तिशाली आयोग बनाएर (सुकुम्बासीहरुको) वर्गीकरण गरेर अधिकार दिने कुरा सुनिश्चित गर्न सक्छौं । 

तर अत्यन्त समस्याका रुपमा देखिएका, हाकाहाकी गैरकानुनी देखिएका, नागरिक असुरक्षित रहने खोला किनारमा बसेका साथीहरुको हकमा काठमाडौंमा जे भएको हो, देशैभरिको अवस्था त्यो होइन । 

उहाँहरु जजसलाई उठाइएको छ । उहाँहरुलाई (बसोबासको) सुनिश्चित गर्छौंं उहाँहरुले आफ्नो हक अधिकार पाउनुहुन्छ । एउटा पनि नागरिकलाई घरबारविहीन बनाइने छैन । तपाईंहरुले शानका साथ भन्न सक्नुहुन्छ, कसैले कुनै पनि अप्ठेरो मान्नुपर्दैन । 

सरकारबाट कमी कमजोरी भए होलान्, कमजोरी भएको रहेछ भने ती सुध्रिन्छन् । यत्तिका वर्ष सुकुम्बासीहरुलाई राजनीतिको शिकार बनाइयो । भोट जसलाई हाले पनि हुन्छ, तर समस्याको समाधान रास्वपा सरकारले गर्छ ।