स्मार्ट टेलिकम प्रकरणमा मेरो संलग्नता छैन : पूर्वमन्त्री खरेल

पूर्वसञ्चार तथा सूचना प्रविधिमन्त्री जगदिश खरेलले स्मार्ट टेलिकम प्रकरणमा आफूले एउटा पनि मिटिङ र फाइल पारित नगरेको स्पष्टीकरण दिएका छन् । 

सोमबार प्रतिनिधिसभाको बैठकमा बोल्दै उनले स्मार्ट टेलिकमको सम्पत्ति बिक्रीसम्बन्धी प्रकरणमा आफूहरुलाई अनाहकमा जोडिएको बताए ।

पूर्वमन्त्री खरेलले स्मार्ट टेलिकम प्रकरणमा आफूले एउटा पनि मिटिङ नगरेको र कुनै पनि फाइल सदर नगरेको जिकिर गरे । 

‘स्मार्ट टेलिकम प्रकरणमा घोटाला त परै जाओस् एउटा मिटिङ मात्र गरेको रहेछ भने राजनीतिक जीवनबाट सन्यास लिन्छु’, खरेलले भने । 

स्मार्ट टेलिकमले लाइसेन्स नवीकरण नगरेपछि उसका सबै चल अचल सम्पत्ति सरकार मातहत आएको थियो । तर ती सम्पत्ति बिक्री भएको पाइएपछि अहिले प्रहरीको केन्द्रीय अनुसन्धान ब्यूरोले अनुसन्धान गरिरहेको छ ।  

पूर्वसञ्चारमन्त्री खरेलले पत्रकारहरुसँग प्रतिक्रिया दिँदै स्मार्ट टेलिकमको विषयमा आफूले पीडितहरुको कुरा सुनेको बताएका छन् । तर सरकार चुनावमा नै केन्द्रित रहेकाले त्यो विषयमा हात नहालेको, चुनावपछिको सरकारले समाधान गर्छ भनेर छाडेको उनको भनाइ छ ।