नेपाल सुपर लिग होम एण्ड अवे फरम्याटमा, १० वटा क्लब सहभागी हुने

१० वटा टिम । होम एण्ड अवे फरम्याट । 

नेपाली फ्रेन्चाइज लिग फुटबल प्रतियोगिता नेपाल सुपर लिग सिजन ४ मा आइपुग्दासम्म धेरै नै परिस्कृत भएको छ । 

एनएसएलको सिजन ४ आउँदो सेप्टेम्बर ५ अर्थात भदौ २० गते सुरु हुनेछ । र यो लिग होम एण्ड अवे फरम्याटमा हुनेछ । अनि अहिलेसम्म ७ टिम मात्र रहेकामा यस वर्ष ३ वटा टिम थपिँदैछ । 

नेपाल सुपर लिगका अध्यक्ष श्रेयांश कार्कीका अनुसार यस वर्ष विराटनगर, धरान, वीरगञ्ज र सुर्खेत मध्येबाट ३ वटा क्लब थप हुनेछन् । एनएसएलले ती ठाउँबाट एनएसएल क्लब लिन चाहने व्यक्ति, समूह वा संघ संस्थासँग प्रस्ताव आह्वान गरेको छ । 

नेपाल सुपर लिगमा काठमाडौं रेजर्स, ललितपुर सिटी एफसी, चितवन एफसी, पोखरा थन्डर्स, बुटवल लुम्बिनी एफसी, धनगढी एफसी र झापा एफसी गरी ७ क्लब छन् । 

एनएसएल हाल काठमाडौंको दशरथ रंगशालामा करिब एक महिना अवधि सञ्चालन हुँदै आएको थियो । टिम संख्या बढेपछि र होम एण्ड अवे फरम्याटमा हुने भएपछि उपत्यका बाहिरका शहरमा पनि एनएसएलका खेलहरु हुनेछ । यसले फुटबलमा व्यवसायिकताको विकास गर्ने एनएसएलको विश्वास छ । 

हाल नेपालमा फुटबलको अभिभावकीय संस्था अखिल नेपाल फुटबल संघ (एन्फा)ले समेत नियमित रुपमा र होम एण्ड अवेमा फुटबल खेलाउन सकेको छैन । 

हेर्नुहोस् नेपाल सुपर लिगको विज्ञप्ति