महामन्त्री राणाले राप्रपा छाडे, अब नयाँ पार्टी खोल्ने

राष्ट्रिय प्रजातन्त्र पार्टीका महामन्त्री डा. धवलशमशेर राणाले पार्टी छाडेका छन् । उनले राप्रपा जनताको नजरमा गिरिसकेको, पार्टीमा धमिरा लागिसकेको र आफ्नो निष्ठाका मानकहरुको संरक्षणसमेत गर्न नसक्ने निश्चित भएको भन्दै अब नयाँ पार्टी गठन गर्ने बताएका छन् ।

बिहीबार एक विज्ञप्ति जारी गर्दै उनले पार्टीमा विगत चार वर्ष तनाव र दूषित भावमा बितेको बताए । संस्थापनले नेता, कार्यकर्ताको आत्मसम्मानमा चोट पुग्ने गरी लखेटिरहने, कारबाही गरिरहने र आफूहरु अन्यायविरुद्ध बचाउमा लागिरहने काम मात्र भएको राणाले बताएका छन् ।

निजी स्वार्थमा संस्थापनबाट नै स्व:पक्षीय गुट बनाइयो, त्यसको एकमात्र ध्येय पार्टी कब्जामा सीमित रह्यो। आत्मियता, परस्पर सद्भाव धुजाधुजा बनाइयो । वैचारिक आदर्शसंग धोका र खेलवाड प्रतिविम्व भयो कि, राप्रपा भित्रभित्रै मक्कियो। प्रतिफलस्वरूप राप्रपा जनताको नजरमा गिर्‍यो  र जनमतबाट तिरस्कृत बन्यो', उनले भनेका छन् ।

जनस्तरबाट प्राप्त सद्भाव र विश्वासलाई आत्मसात गर्दै समयको माग र राष्ट्रको आवश्यकताअनुरूप एक कर्मनिष्ठ राष्ट्रवादी राजनीतिक दलको नवनिर्माणको प्रक्रियाको थालनी भएको राणाले बताएका छन् ।

उनले संवैधानिक राजसंस्थात्मक जनप्रतिनिधिमूलक आधुनिक प्रजातान्त्रिक राज्यप्रणाली तथा हिन्दु, बौद्ध, किरात सहितको सनातनी पहिचान अब बन्ने पार्टीको आधारशीला हुने बताएका छन् ।

२०७८ साल मंसिरमा भएको महाधिवेशनबाट राजेन्द्र लिङ्देन अध्यक्षमा निर्वाचित हुँदा धवल महामन्त्री निर्वाचित भएका थिए । त्यतिबेलाका अध्यक्ष कमल थापाविरुद्ध लिङ्देन र राणाले मिलेर मोर्चाबन्दी गरेका थिए । तर उनीहरुको सहकार्य लामो समय टिकेन ।

लिङ्देन पक्षले राणाले पार्टी हित विपरीत गुटबन्दी  गरेको आरोप लगाए भने राणा पक्षले अध्यक्ष लिङ्देनको कार्यशैलीमाथि आपत्ति जनाए । 

पार्टीभित्र गुटगत झगडा बढ्दै गएपछि राणा पक्षका १८३ जना नेताले बिहीबार नै पार्टी छाडेका छन् । जसमा उपाध्यक्ष मुकुन्दश्याम गिरी,  नेता दिलनाथ गिरी, केशवराज श्रेष्ठ, नारायणप्रसाद कोइराला, सगुन लावती, धनसुर शाहीलगायत रहेका छन् ।